Ակնկալվում է, որ ԱՄՆ-ի արդարադատության նախարարությունը եւ դատախազությունը հաջորդ շաբաթ դատական հայց կներկայացնեն Google-ի դեմ` մենաշնորհային չարաշահումների համար, հաղորդում է Politico-ն` վկայակոչելով թեմայի քննարկումներին ծանոթ աղբյուրներ:
Արդարադատության նախարարությունը, որը 16 ամիս շարունակ ստուգումներ էր անցկացնում Google-ի դեմ, այս շաբաթ շրջանառեց առաջարկվող հայցի տեքստը, հայտնում են աղբյուրները:
Դատական գործընթացը կարող է հրապարակվել հաջորդ շաբաթվա վերջին կամ հոկտեմբերի 12-ից հետո` այն օրը, երբ ԱՄՆ-ում նշվում է Կոլումբոսի օրը:
Բացի այդ, ինչպես նշել են աղբյուրները, ԱՄՆ արդարադատության նախարարությունն ուրբաթ քննարկել է մենաշնորհային չարաշահման մեղադրանքով առաջադրված հայցը:
Նշվում է, որ այս դատավարությունը վերջին տասնամյակների ընթացքում Միացյալ Նահանգների խոշորագույն իրավական քայլն է կորպորատիվ մենաշնորհների դեմ պայքարում: Մասնավորապես, խոսքն առցանց որոնման շուկայում չարաշահումների մասին է:
Ակնկալվում է, որ դատական հայցը կներառի Google-ի` սմարթֆոններ արտադրողների եւ Apple-ի հետ կնքած պայմանագրերի պահանջները` բջջային սարքերում այն որոնողական համակարգ դարձնելու համար: Անդրադարձ կլինի նաեւ Google-ի որոնողական բիզնեսի այլ ասպեկտներին: