ԱՄՆ պետքարտուղար Մայք Պոմպեոն մեկնաբանել է Ֆրանսիայի նախագահ Էմանուել Մակրոնի խոսքերը Սիրիայի Հալեպ նահանգից իսլամիստ գրոհայիններին Թուրքիայի տարածքով Լեռնային Ղարաբաղ տեղափոխման մասին, որոնք կապված են Ռուսաստանում արգելված «Իսլամական պետություն» ահաբեկչական կազմակերպության հետ:
«Ես նույնպես տեսա այդ հաղորդագրությունները: Իրականում, սա այն ամենն է, ինչ ես միայն կարող եմ ասել այս պահին: Հուսով եմ` դա այդպես չէ: Մենք տեսանք, թե ինչպես են սիրիացի զինյալները Սիրիայից տեղափոխվում Լիբիա: Դա ավելացրեց անկայունությունը, ավելի շատ հուզումներ ստեղծեց, ավելի շատ բախումներ, ավելի շատ մարտեր, ավելի քիչ խաղաղություն: Կարծում եմ, որ դա նույնը կանի նաեւ Լեռնային Ղարաբաղում եւ դրա շուրջ հակամարտության դեպքում: Այնպես որ, հուսով եմ, որ այդ տվյալները ճիշտ չեն լինի»,- ՏԱՍՍ-ը մեջբերում է ամերիկյան դիվանագիտության ղեկավարի խոսքերը:
«Դուք պետք է հարցնեք Թուրքիայի նախագահ [Թայիփ] Էրդողանին, բայց մեր տեսակետը բավականին հետեւողական է: Սա երկարատեւ հակամարտություն է: Երբ այս լարվածությունը սրվում է, [եթե] երրորդ կողմերը զինամթերք, զենքի համակարգեր են մատակարարում, դուք բարդացնում եք իրավիճակը, մեծացնում եք մարդկային կորուստների ռիսկը եւ նվազեցնում խաղաղության հնարավորությունը: Այնպես որ, մենք բոլորին հորդորել ենք պարզապես չմասնակցել դրան` բացառությամբ հրադադարի եււ երկխոսության կոչերի` որպես կարգ եւ խաղաղություն վերականգնելու միջոց: Իհարկե, մենք դա փոխանցեցինք Ադրբեջանի եւ Հայաստանի ղեկավարներին, ինչպես նաեւ` թուրքերին»,- հավելել է ԱՄՆ պետքարտուղարը:
Միեւնույն ժամանակ, Միացյալ նահանգների Պետդեպարտամենտի մամուլի ծառայությունը հայտարարել է, որ ԱՄՆ պետքարտուղարի օգնականի պաշտոնակատար Ֆիլիպ Ռիքերը շաբաթ օրը կայցելի Թուրքիա:
ԱՄՆ ԱԳՆ-ում պարզաբանել են, որ Պետդեպարտամենտի պաշտոնյան հոկտեմբերի 3-ից 5-ը կայցելի Անկարա եւ Ստամբուլ: «Ռիքերը կհանդիպի թուրք գործընկերների հետ` ՆԱՏՕ-ի մեր դաշնակցի հետ ԱՄՆ հարաբերությունները զարգացնելու, ինչպես նաեւ Արեւելյան Միջերկրական ծովում եւ Կովկասում իրավիճակը քննարկելու համար»,- ասել են նախարարությունից:
