«Ես տխուր եմ եւ զայրացած մարդկանց ողբերգական մահվան կապակցությամբ` ինչպես քաղաքացիական անձանց, այնպես էլ զինվորականների, Հայաստանի եւ Ադրբեջանի միջեւ ռազմական գործողությունների նոր բռնկման հետեւանքով: Այս ռազմական գործողություններն արագ լայնամասշտաբ պատերազմի են վերաճում, որը լրջորեն սպառնում է կայունությանը տարածաշրջանում»: Այս մասին հայտարարել է ԵԽԽՎ մոնիտորինգի հանձնաժողովի նախագահ Մայքլ Աաստրուպ Յենսենը (Դանիա):
«Երեկվա նիստին հանձնաժողովը Հայաստանի եւ Ադրբեջանի խորհրդարանականների ներկայությամբ քննարկել է այս խորը մտահոգիչ իրադարձությունները եւ երկու երկրներին էլ կոչ է արել լիովին հետեւել իրենց պարտավորություններին Եվրոպայի խորհրդի առջեւ եւ հետեւել Մարդու իրավունքների եվրոպական կոնվենցիային: Այն կողմերին կոչ է արել առանց նախապայմանների անհապաղ հրադադար հաստատել եւ վերադառնալ բանակցային սեղանի շուրջ` ԵԱՀԿ Մինսկի խմբի հովանու ներքո: Այս հակամարտության խաղաղ կարգավորումն այլընտրանք չունի»,- հավելել է Յենսենը:
«Եվս մեկ անգամ ուզում եմ հիշեցնել, որ, դառնալով Եվրոպայի խորհրդի անդամ, երկու երկրներն էլ պարտավորվել են խաղաղ ճանապարհով լուծել իրենց վեճերը: Այդ պարտավորությունը, որը ստանձնում են բոլոր անդամ պետությունները, նշանակում է նաեւ, որ անդամ պետությունները պետք է զերծ մնան ցանկացած գործողությունից կամ հայտարարությունից, որը պատերազմող պետություններին դրդում է իրենց վեճերը լուծել ուժի միջոցով: Այս կապակցությամբ կոմիտեի անդամները դատապարտել են Թուրքիայի սադրիչ հռետորաբանությունը, ինչպես նաեւ հայտնել են հակամարտության մեջ անմիջական մասնակցության մասին եւ կոչ են արել անհապաղ դադարեցնել այն»,- եզրափակել է նա:
