Այսօրվա նիստն անցկացվում է Հայաստանի համար դժվար ժամանակներում: Այս մասին այսօր՝ հոկտեմբերի 9-ին, Եվրասիական միջկառավարական խորհրդի նիստի ժամանակ հայտարարեց ՀՀ վարչապետ Նիկոլ Փաշինյանը:
Նա իր ելույթում նշեց.
«Երկու շաբաթ է՝ չեն դադարում շփման գծում մարտական գործողությունները ժամանակակից սպառազինության բոլոր տեսակների կիրառմամբ: Լեռնային Ղարաբաղի եւ Հայաստանի գյուղերն ու քաղաքները, ինչպես նաեւ քաղաքացիական նշանակության օբյեկտներն ու ենթակառուցվածքները գտնվում են Ադրբեջանի հրետակոծության եւ հրթիռակոծության տակ: Կան բազմաթիվ զոհեր եւ վիրավորներ, այդ թվում քաղաքացիական բնակչության շրջանում: Սակայն վստահեցնում եմ, որ չնայած բոլոր դժվարություններին՝ մեր ժողովուրդը միասնական է եւ վճռական՝ պայքարելու մինչեւ վերջ եւ պաշտպանելու իր ազատությունն ու անկախությունը: Հատկապես երախտագիտությունս եմ ուզում հայտնել պատվիրակության անդամներին այս դժվարի պահին Հայաստան ժամանելու համար: Դա հատկապես կարեւոր է մեզ համար: Ցավոք, Ղրղզստանի հանրապետության վարչապետը չկարողացավ գալ Հայաստան, եւ մենք ստիպված ենք նիստն առանց նրա անցկացնել: Խաղաղություն եւ երկրում ներքաղաքական իրավիճակի կարգավորում եմ մաղթում մեր բարեկամ Ղրղզստանին եւ նրա ժողովրդին»: