Մենք հավատարիմ ենք Լեռնային Ղարաբաղի հակամարտության խաղաղ կարգավորման սկզբունքին եւ պատրաստ ենք վերսկսել խաղաղ բանակցությունները՝ վերջին օրերին ԵԱՀԿ Մինսկի խմբի համանախագահ երկրների ԱԳՆ ղեկավարների եւ նախագահների կողմից արված հայտարարություններին համապատասխան: Այս մասին այսօր Եվրասիական միջկառավարական խորհրդի նիստի ժամանակ հայտարարեց ՀՀ վարչապետ Նիկոլ Փաշինյանը:
«Մեր երկիրն ու մեր ժողովուրդն այսօր դժվար ժամանակներ են ապրում: Արդեն երկու շաբաթ է՝ Թուրքիայի աջակցությամբ Ադրբեջանը շարունակում է սպառազինությունների տարբեր տեսակների կիրառմամբ լայնամասշտաբ հարձակումը ոչ միայն Ղարաբաղի, այլ նաեւ Հայաստանի դեմ: Մենք դա գնահատում ենք որպես ադրբեջանա-թուրքական սպառնալիք հայ ժողովրդի դեմ: Մեր քաղաքներն ու գյուղերը հրետակոծվում են, կան բազմաթիվ զոհեր եւ վիրավորներ: Հատկապես տուժել է Ղարաբաղի մայրաքաղաք Ստեփանակերտը, որի բնակչությունը հումանիտար աղետի շեմին է: Կոնֆլիկտին ներգրավված են Սիրիայից վարձկաններ եւ գրոհայիններ: Այդ փաստը հաստատել են նաեւ ԵԱՀԿ Մինսկի խմբի համանախագահ երկրները, ինչպես նաեւ բազմաթիվ հեղինակավոր ԶԼՄ-ներ: Հատկապես սպառնալիք են ներկայացնում տարածաշրջանն ու աշխարհն ապակայունացնող Թուրքիայի գործողությունները: Մեր հակառակորդին չի հաջողվել որեւէ էական հաջողության հասնել: Մեր ժողովուրդը համախմբված է առավել, քան երբեւէ»,-ասաց նա:
