Եվրամիության անդամ երկրները ձախողման են նախապատրաստվում Մեծ Բրիտանիայի հետ առեւտրային համաձայնագրի կնքման շուրջ բանակցություններում, որը կկարգավորեր Լոնդոնի եւ Բրյուսելի հարաբերությունները Brexit-ի անցումային շրջանի ավարտից հետո, հայտնում է ՏԱՍՍ-ը` վկայակոչելով The Daily Telegraph-ը:
Պարբերականի բարձրաստիճան դիվանագիտական աղբյուրը կարծում է, որ կողմերը, փոխադարձ անզիջողականության պատճառով, կարող են չհամաձայնեցնել գործարքը մինչ կնքման վերջնաժամկետը (հոկտեմբերի 15), իսկ դա իր հերթին «քաոսի ժամանակաշրջանով» է սպառնում ապագայում: Ընդ որում, ԵՄ երկրներից մեկի դիվանագետը չի բացառել առեւտրային բանակցությունների վերսկսման հնարավորությունն ապագայում: «Որեւէ հիմք չկա ասելու, որ գործարքի բացակայության պատճառով բանակցություններ այլեւս երբեք չեն կարող լինել»,- ասել է նա:
Այնուամենայնիվ, թերթի մեկ այլ եվրոպական աղբյուր պնդում է, որ ապագայում համաձայնագրի բացակայության դեպքում Բրյուսելի հետ առեւտրային բանակցությունների վերսկսում չի կարող լինել: Փոխարենը, Մեծ Բրիտանիան ստիպված կլինի երկկողմ համաձայնագրեր կնքել առանձին անդամ երկրների հետ` տնտեսական հետեւանքները մեղմելու համար:
Միացյալ Թագավորությունը եւ Եվրամիությունն ավելի վաղ խոստովանել էին, որ գործարքի շուրջ բանակցությունները դժվար են ընթանում, Brexit-ի անցումային շրջանի ավարտին մինչեւ տարվա վերջ ավելի քիչ ժամանակ է մնացել: Ավելի վաղ Մեծ Բրիտանիայի վարչապետ Բորիս Զոոնսոնը որպես համաձայնության հասնելու վերջնաժամկետ սահմանել էր հոկտեմբերի 15-ը (այդ օրը Բրյուսելում նախատեսված է ԵՄ գագաթնաժողովը): Նրա խոսքով` հոկտեմբերի կեսերից հետո բանակցությունները շարունակելու իմաստ այլեւս չկա:
