Ամերիկյան խոշոր պարբերականներն իրենց լրագրողներին արգելել են մասնակցել Թրամփի նախընտրական միջոցառումներին՝ կորոնավիրուսով վարակվելու սպառնալիքի պատճառով, գրում է New York Times-ը:
Պարբերականի տվյալներով՝ բացի NYT-ից ուղեւորություններից հրաժարվել են նաեւ Wall Street Journal-ը, Washington Post-ը, BuzzFeed News-ը, Politico-ն եւ Hearst-ը, ինչպես նաեւ Los Angeles Times-ը:
«Սպիտակ տան թղթակիցների մոտ մտավախություններ են եղել՝ կապված իրենց անվտանգության հետ, եւ նրանք չեն կարողացել ճանապարհորդել Թրամփի հետ»,-ասել է Times-ի վաշինգտոնյան բյուրոյի ղեկավար Էլիզաբեթ Բումիլերը:
Խմբագրություններն ու լրագրողները մտահոգված են, որ բորտուղեկցորդները, Գաղտնի ծառայության գործակալները, ինչպես նաեւ Սպիտակ տան աշխատակիցները պաշտպանիչ դիմակներ չեն կրում նախագահական ինքնաթիռում: Նրանց մի մասը աշխատանքի է վերադարձել երկշաբաթյա կարանտինի ավարտից հետո: Սպիտակ տան առնվազն 3 թղթակից վարակվել է կորոնավիրուսով, ներառյալ՝ Times-ի թղթակից Մայքլ Շիրը: