Աթենքը եւ Նիկոսիան Բրյուսելի գագաթնաժողովին ԵՄ անդամ երկրների ղեկավարներին կներկայացնեն թուրքական սադրանքների հարցն Արեւելյան Միջերկրական ծովում եւ Կիպրոսի բուֆերային գոտում: Այս մասին ճեպազրույցում հայտարարել է Հունաստանի կառավարության պաշտոնական ներկայացուցիչ Ստելիոս Պեցասը, փոխանցում է ՏԱՍՍ-ը:
Նա նշել է, որ «վարչապետ Կիրիակոս Միցոտակիսն արդեն Բրյուսելում է, որտեղ եւ նա, եւ Կիպրոսի Հանրապետության Նախագահ Նիկոս Անաստասիադիսը կբարձրացնեն թուրքական վերջին սադրանքների հարցը Ֆամագուստայի առափնյա գոտու բացումից հետո [Կիպրոսի բուֆերային գոտում] եւ [թուրքական հետազոտական նավի] Oruc Reis-ի նոր ելքը դեպի ծովային տարածքներ, որոնք մասամբ գտնվում են Հունաստանի մայրցամաքային ջրերում»: «Փաստ է, որ Անկարայի այս երկու սադրիչ քայլերն էլ ուղղակիորեն հակասում են վերջերս տեղի ունեցած գագաթնաժողովի [հոկտեմբերի 1-2] եզրակացությունների հատուկ կետերին»,- ասել է կաբինետի ներկայացուցիչը:
Պեցասի խոսքով` Հունաստանը վստահորեն պնդում է Արեւելյան Միջերկրական ծովի ջրային գոտիների բաժանման շուրջ տարաձայնությունների դիվանագիտական կարգավորումը եւ շարունակում է իր ռազմավարական դաշինքներին ուղղված ջանքերը: «Մենք համոզվում ենք, որ մեր դիրքորոշումներն արդեն ընդունում են ոչ միայն ԵՄ-ն, այլեւ ԱՄՆ-ն, որը հրաժարվել է հավասար հեռավորության պահպանման մարտավարությունից, մեղադրում է Թուրքիային տարածաշրջանում միակողմանի լարվածությունը մեծացնելու մեջ եւ կոչ է անում վերջ տալ նախապես ծրագրված սադրանքին [Oruc Reis նավի նոր ելքով Հունաստանի ջրեր] եւ անմիջապես հետազոտող քննարկումներ սկսել Հունաստանի հետ»,- ասել է Պեցասը:
Ընդ որում, կառավարության ներկայացուցիչը նշել է, որ «Հունաստանը օպերատիվ մակարդակում անում է այն, ինչ անհրաժեշտ է, ինչպես եւ Oruc Reis նացի նախորդ ելքի դեպքում էր»: «[Հունաստանի] զինված ուժերը գործում են ազգային շահերը պաշտպանելու իրենց առաքելության շրջանակներում: Այս տարի նրանք բազմիցս ապացուցել են, որ ունակ են իրենց գործը լավ կատարել»,- ասել է Պեցասը:
Նրա խոսքով` Անկարան կարճ ժամանակում երկրորդ անգամ է խախտում իր ստանձնած պարտավորությունները: «Թուրքիայի արտգործնախարարն իր հույն գործընկերոջ հետ վերջերս կայացած կարճատեւ հանդիպման ժամանակ խոստացավ օր առաջարկել Թուրքիայում հետազոտող շփումների 61-րդ փուլի անցկացման համար: Բայց այդ հրավերի փոխարեն սադրանք իրականացվեց: Եվ ըստ էության` կրկնակի (Oruc Reis-ի ելքը ծով եւ Ֆամագուստա քաղաքի առողջարանային Վարոշա թաղամասի ափի բացումը - ՏԱՍՍ): Եվ սա փաստ է, որն ապացուցում է Թուրքիայի անվստահելիությունը, ինչպես նաեւ նրա անհարգալից վերաբերմունքը 2020 թվականի հոկտեմբերի 1-2-ը Եվրամիության գագաթնաժողովին կայացված եզրակացությունների նկատմամբ: Այսօր Եվրախորհուրդը կրկին նիստ է անցկացնում»,- ասել է Պեցասը:
Նրա խոսքով` Հունաստանը հավատարիմ է մնում այն դիրքորոշմանը, որն արտահայտել է երկրի վարչապետն այն պահից, երբ թուրքական հետազոտական նավն առաջին անգամ մտավ Հունաստանի ջրեր, եւ որն ամփոփվում է «սադրանքները դադարեցվում են, սկսվում են քննարկումները» արտահայտությամբ: «Ինչպես առաջ, այնպես էլ հիմա մենք շեշտում ենք, որ հետախուզող կապերը չեն կարող իրականացվել սպառնալիքների եւ շանտաժի պայմաններում:
Քանի դեռ Oruc Reis-ը մնում է Հունաստանի մայրցամաքային ջրերում, հետազոտող կապերն անհնար են: Թուրքիան չի կարող խոսել քննարկումների մասին, երբ հետազոտական նավը գտնվում է տարածքում, որի բաժանման մասին, ինչպես ենթադրվում է, որ այն ցանկանում է պայմանավորվել»,- շեշտել է Պեցասը:
