Ադրբեջանական զինուժի կողմից գերեվարված հայերի նվաստացումները եւ սպանությունները ցույց է տալիս մեր առջեւ ծառացած բարբարոսության խորությունը: Այս մասին հայտարարել է Հայաստանի արտաքին գործերի նախարար Զոհրաբ Մնացականյանն իր հույն գործընկեր Նիկոս Դենդիասի հետ համատեղ մամուլի ասուլիսին:
«Եվ սա նորություն չէ: Սա եւս մեկ անգամ հաստատում է, որ խոսքն Արցախի ժողովրդի ֆիզիկական գոյության մասին»,- ընդգծել է նախարարը` հավելելով, որ խոնարհվում է Հայրենիքը պաշտպանող բոլոր հերոսների առջեւ:
Նախարարը հայտարարել է, որ միջազգային հանրությունը պետք է տեղեկացված լինի այս բարբարոսության խորության մասին: «Իրավական եւ քաղաքական հետեւանքները կարող են տարբեր կերպ արտահայտվել, կլինեն ընթացակարգային հարցեր: Աշխարհը պետք է տեսնի, որ Ադրբեջանը քանդոմ է քաղաքակիրթ աշխարհի բոլոր հնարավոր նորմերը: Սա է այս հակամարտության էությունը»,- հայտարարել է Զոհրաբ Մնացականյանը:
Նախօրեին սոցցանցերի ադրբեջանական հատվածում գերեվարված հայերի սպանության, ինչպես նաեւ սպանվածների դիերի նվաստացման տեսանյութեր եւ լուսանկարներն էին հայտնվել: Սա առաջին անգամը չէ, երբ Ադրբեջանը նման բարբարոսական պրակտիկա է կիրառում: Ապրիլյան պատերազմի ընթացքում եւս նման հրեշավոր գործողություններ էին արձանագրվել, որոնց համար «հերոսները» պարգեւներ ստացան անձամբ Իլհամ Ալիեւի ձեռքից:
