Շաբաթ օրն Իսրայելում բողոքի ցույց է անցկացվում Ադրբեջանին զենք վաճառելու դեմ, որ Հայֆայից Երուսաղեմ ավտոերթ է ներառում եւ ցույց Կնեսետի շենքի դիմաց: Ըստ կազմակերպիչների` ցույցին մասնակցում է 300 ավտոմեքենա եւ մի քանի հարյուր մարդ:
Ակցիայի մասնակից, քաղաքագետ Մենդել Կորսունսկու խոսքով` ակցիայի նպատակն է պահանջել դադարեցնել զենքի մատակարարումն Ադրբեջանին. «Իսրայելական հրթիռներն ու անօդաչու թռչող սարքերը ծառայում են Ադրբեջանին եւ օգտագործվում են խաղաղ բնակչության դեմ: Մենք պահանջում ենք դադարեցնել զենքի մատակարարումն Ադրբեջանին»:
Ավտոերթին մասնակցող ավտոմեքենաները զարդարված են Հայաստանի ազգային դրոշի գույներով: Հանրահավաքին մասնակցում են Իսրայելի հայ համայնքի անդամները: Նրանց միացել են նաեւ հայ հոգեւորականության ներկայացուցիչները:
Կորսունսկու խոսքով` չնայած նրան, որ Կնեսետի մոտ ցույցն արտոնված չէր իշխանությունների կողմից, ոստիկանությունը միջոցներ չի ձեռնարկել ցույցը ցրելու համար: