Դատախազությունն Ադրբեջանի զինված ուժերի հանցանքների եւ ագրեսիայի փաստերով բազմաթիվ քրեական գործեր է հարուցել՝ ահաբեկչությունից մինչեւ սպանություն: Այս մասին այսօր ճեպազրույցի ժամանակ հայտարարեց ՀՀ զինվորական դատախազության ավագ դատախազ Արշակ Մարտիրոսյանը:
Նրա խոսքով՝ հարուցվել են քրեական գործեր ագրեսիվ պատերազմի, միջազգային մարդասիրական իրավունքի լրջագույն խախտումների փաստերով հուլիսին Տավուշի ուղղությամբ Ադրբեջանի գործողությունների հետ կապված: Ադրբեջանի ԶՈւ ականանետից եւ հրետանուց արձակած կրակի հետեւանքով տուժել են հայկական 8 բնակավայրեր, նյութական վնաս է հասցվել առանձնապես խոշոր չափով:
Սեպտեմբերի 27-ին լայնամասշտաբ ագրեսիայի փաստով քրեական գործեր են հարուցվել ՔՕ մի շարք հոդվածներով, այդ թվում ագրեսիվ պատերազմ վարելու, միջազգային մարդասիրական իրավունքը խախտելու, ենթականերին անօրինական հրամաններ արձակելու, վարձկանների ներգրավելու հատկանիշներով:
Ագրեսիայի ընթացքում կրակի տակ է հայտնվել ՀՀ տարածքը, մասնավորապես՝ Գեղարքունիքի եւ Սյունիքի մարզերը: Այդ փաստերով եւս քրեական գործեր են հարուցվել ՔՕ մի շարք հոդվածների՝ ագրեսիվ պատերազմ վարելու, միջազգային մարդասիրական իրավունքը խախտելու, ենթականերին անօրինական հրամաններ արձակելու հատկանիշներով:
Ավագ դատախազը հայտնեց, որ Ադրբեջանի կողմից մարտական գործողություններին տարբեր ահաբեկչական խմբավորումներից ներգրավված արտասահմանցի վարձկանները կրել են Ադրբեջանի ԶՈւ համազգեստ, որպեսզի թաքցնեն իրենց ինքնությունը: Կան տվյալներ Հորադիզի շրջանում նրանց ակտիվ գործողությունների մասին:
Ինչպես նաեւ քրեական գործ է հարուցվել Հադրութի շրջանում դիվերսիոն-հետախուզական խմբի գործողությունների փաստով: Դիվերսանտներն այրել են խաղաղ բնակիչների տները, սպանել են մորն ու որդուն: Առանձին քրեական գործ է հարուցվել միջազգային ահաբեկչության փաստով:
Շարունակվում է այդ բոլոր դրվագների քննությունը: