ՀՀ-ում ԱՄՆ դեսպանատան ներկայացուցիչն այսօր պատրաստվում է զեկուցագրով հանդես գալ եւ Վաշինգտոնին ներկայացնել Արցախում տիրող իրադրությունը։ Այս մասին լրագրողների հետ զրույցում հայտնեցին դեսպանատան դիմաց բողոքի ակցիա իրականացնողները, որոնցից մի քանիսը հանդիպել էին դեսպանատան ներկայացուցչի հետ։
«Դեսպանատան ներկայացուցիչը նշեց, որ իրենք անմիջական կապի մեջ են Արցախի ՄԻՊ-ի, ԱԳՆ-ի հետ եւ այդ տեղեկատվությունը պարբերաբար ուղարկվում է Վաշինգտոն։ Այն տեսանյութը, որում երեւում է, թե ինչպես են հայ գերուն ադրբեջանցիները կենդանի մորթում, ցույց տվեցինք, որը չկարողացավ նայել, փակեց աչքերն ու թեքեց գլուխը։ Քաջ գիտակցում են հայերի նկատմամբ այդ գործողություններն ու շարունակում են լռել»,- ասաց ակցիայի մասնակիցը։
Նա նշեց, որ իրենք հանդիպմաան ընթացքում նաեւ պահանջել են՝ ԱՄՆ-ն պետք է դադարեցնի Թուրքիային զենքի վաճառքը։
Ակցիայի մասնակիցներից մեկն էլ նշեց, որ իրենց ասել են՝ հարցի լուծումը տեսնում են ԱՄՆ-ի կողմից բացառապես Արցախի անկախության ճանաչումը, այլ ելք չի կարող լինել։
«Մենք փոխանցեցինք հայ զինվորի գլխատված նկարն ահաբեկիչների ձեռքում. դրա վերաբերյալ Վաշինգտոնը պետք հստակ գնահատական հնչեցնի։ Մեր ցավի նկատմամբ ոչ մի տերությունն չպետք է անմասն մնա, որովհետեւ սա սպառնում է բոլորին։ Նշվեց, որ ԱՄՆ-ն մարդասիրական արժեքների կողմնակիցն է եւ այժմ կոպտագույն ձեւով խախտվում են այդ բոլոր իրավունքները եւ հարցին՝ ինչո՞ւ է լռում եւ պատասխանն էր ուղղակի խորիմաստ հայացքը»,- ասաց ակցիայի մասնակիցը։
Ակցիայի մասնակիցները ՀՀ-ում ԱՄՆ դեսպանատան դիմաց բողոքի ակցիան դադարեցրին, նշելով, որ կսպասեն արդյունքներին։
