Եվրոպայում նոր սահմանափակումներ են մտցվում, քանի որ COVID-19-ի հետեւանքով մահվան դեպքերի թիվը գերազանցել է 250 հազարը: Բելգիայում հոկտեմբերի 19-ի գիշերը համապետական պարետային ժամ է մտցվել, Շվեյցարիայում պարտադրվել է դիմակ կրել հասարակական վայրեր հանդիսացող փակ տարածքներում, փոխանցում է AFP-ն:
Ինչպես ավելի վաղ պարզաբանել էր Բելգիայի վարչապետ Ալեքսանդր Դե Կրոոն, պարետային ժամը գործում է 00.00-ից 05.00-ն: Բացի այդ, բոլոր բարերն ու ռեստորանները փակ են այցելությունների համար. դրանց թույլատրվում է միայն տեյք ըվեյ վաճառել կամ առաքել իրենց արտադրանքը: «Մենք չենք զգում, որ մեր շահերը հաշվի են առնվել, դա ինձ ցավ է պատճառում»,- այս առնչությամբ ասել է Բրյուսելի ռեստորաններից մեկի մենեջեր Անջելո Բուսին:
Իր հերթին, Շվեյցարիան արգելել է հասարակական հավաքները ավելի քան 15 հոգով: «Վերջին օրերին վարակման թվի կտրուկ աճը տագնապալի է: Սա, ըստ էության, վերաբերում է բոլոր տարիքային խմբերին»,- նշվում է կառավարության հայտարարության մեջ, փոխանցում է DW-ն:
Ֆրանսիայի նախագահ Էմանուել Մակրոնը եւս հայտարարել է մի շարք քաղաքներում, այդ թվում ՝ Փարիզում, պարետային ժամի մասին` կորոնավիրուսով վարակման դեպքերի թվի աճին ի պատասխան: Փողոց դուրս գալու արգելքը գործում է 21.00-ից 06.00-ն: Սահմանափակիչ միջոցներն ուժի մեջ են մտել հոկտեմբերի 17-ին եւ կտեւեն չորս շաբաթ: Պարետային ժամը, մասնավորապես, տարածվել է Լիլ, Գրենոբլ, Լիոն, Մարսել, Ռուան, Սենթ-Էթյեն, Մոնպելյե եւ Թուլուզ քաղաքների վրա:
Համավարակի սկզբից ի վեր Worldometer կամավորների միջազգային խմբից ստացված տվյալների համաձայն` Բելգիայում, Շվեյցարիայում եւ Ֆրանսիայում վարակվածների թիվը հասել է համապատասխանաբար 222.253-ի, 74.422-ի եւ 897.034-ի: Մահվան դեպքերը կազմում են համապատասխանաբար 10 413, 2 123 եւ 33 477 մարդ:
