Պաշտպանության բանակը նոր տեսանյութ է հրապարակել առաջնագծից։ Շարունակվող պատերազմը հերթական անգամ հայ մարտիկին ուղղորդեց անձնազոհության ու առանձնահատուկ խիզախության։ Հայ զինվորն ու սպան հակառակորդի հետ անհավասար մարտերում կարողացան իրենց ինքնությանը հավատարիմ մնալ ու զինծառայողի սուրբ առաքելությունն իրականացնել պատվով ու արիությամբ։ Հակառակորդի հետ մարտերի ընթացքում առանձնահատուկ սխրանքներով աչքի ընկած զինծառայողները Արցախի Հանրապետության նախագահի հրամանագրերով արժանացել են պետական պարգեւների, իսկ Պաշտպանության նախարարի հրամանով արտահերթ ստացել են զինվորական կոչումներ։
Կորյուն Սողոմոնյանի անմիջական ղեկավարությամբ հետախուզական ստորաբաժանումը կարողացել է ներթափանցել հակառակորդի թիկունք, ոչնչացնել հակառակորդին եւ իրականացնել այլ մարտական խնդիրներ։
«Կոնկրետ խնդիր էր դրված, որ այդ դիրքը պետք է վերցնեինք։ Մեր անձնակազմը միահամուռ ուժերով, բոլորն իրենց գործն իմանալով, գնացել ու մտել ենք դիրք։ Խնդիրը կատարել ենք բարձր տրամադրությամբ»,- պատմում են զինծառայողները;
Զինծառայողները խոստովանում են, որ սկզբում անսովոր էր, կային որոշակի բարդություններ, այժմ իրավիճակին լիովին տիրապետում են ու պատրաստ են ինչպես պաշտպանողական, այնպես էլ հակահարձակողական բնույթի մարտական առաջադրանքներն իրականացնել անհրաժեշտ մակարդակով։
Առիթն օգտագործելով, բանակային համեստ ու լուրջ կեցվածքը մի կողմ թողնելով, զինծառայողները ջերմ բարեմաղթանքներ են ուղղել իրենց հարազատներին ու ամբողջ ազգին վստահեցնելով, որ ամեն ինչ լավ է լինելու։
