Քանի դեռ հումանիտար հրադադարը չի կայացել, չեմ կարծում, որ Փաշինյան-Ալիեւ հանդիպում տեղի ունենա։ Այս մասին այսօր՝ հոկտեմբերի 21-ին, լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը:
Անդրադառնալով ՀՀ նախագահ Արմեն Սարգսյանի՝ Բրյուսել մեկնելու եւ այնտեղ մի շարք բարձրաստիճան գործիչների հետ հանդիպումներ ունենալուն, Մարուքյանը ասաց. «Այցը կարեւոր է, միգուցե ավելի շուտ էր պետք կազմակերպել՝ միջազգային հանրության արձագանքներ ավելի թիրախային եւ օբյեկտիվ դարձնելու համատեքստում։ Օրինակ, մինչ Գյանջային հարվածելը, կասետային ռումբերով Ստեփանակերտն ու այլ քաղաքներն էին ռմբակոծվում, բայց ոչ մի հայտարարություն այդ մասով չի եղել: Սա նշանակում է, որ մեր դիվանագիտությունը բացթողումներ ունի, եւ այդ բացթողումները պետք է վերականգնվեն: Եթե հայտարարություն չի արվում Ստեփանակերտի մասով, չպետք է արվի նաեւ Գյանջայի մասով»։
