Կիպրոսի, Եգիպտոսի եւ Հունաստանի ղեկավարները կրկնել են գործընկեր դառնալու Թուրքիային ուղղված հրավերը՝ հնարավոր օֆշորային գազի հանքավայրերը շահագործելու հարցում՝ կոչ անելով Անկարային դադարեցնել «ագրեսիվ» գործողությունները Միջերկրական ծովի արեւելքում, հայտնում է AP-ը։
Կիպրոսի նախագահ Նիկոս Անաստասիադեսի, Եգիպտոսի նախագահ Աբդել Ֆաթթահ ալ-Սիսիի եւ Հունաստանի վարչապետ Կիրիակոս Միցոտակիսի միջեւ բանակցությունները ներառել են համագործակցություն ամենատարբեր ոլորտներում՝ էներգետիկայից մինչեւ ահաբեկչության դեմ պայքար:
Երեքն էլ դատապարտել են Թուրքիայի բազմաթիվ «սադրանքները», որոնք, ըստ նրանց, կտրուկ մեծացրել են լարվածությունը եւ սպառնում են տարածաշրջանում խաղաղությանը:
«Այս եռակողմ հանդիպման ժամկետը համընկնում է լրացուցիչ վտանգների հետ, որոնք, ցավոք, ստեղծվում են Թուրքիայի ղեկավարության կողմից, որը նախընտրում է կայսերական մեթոդներն ու ագրեսիվ գործողությունները՝ Սիրիայից մինչեւ Լիբիա, Սոմալիից մինչեւ Կիպրոս, Էգեյան ծովից մինչեւ Կովկաս»,- ասել է Միցոտակիսը:
Սակայն եւ՛ Միցոտակիսը, եւ՛ Անաստասիադեսը ձիթենու ճյուղ են մեկնել Թուրքիային՝ առաջարկելով տեղ գտնել եռակողմ գործընկերության մեջ, եթե Անկարան հրաժարվի իր ռազմատենչությունից: «Ես մեկ անգամ եւս կկրկնեմ, որ Թուրքիան (մեր գործընկերությանը) նույնպես կարող է մասնակցել, ոչ ոք դա չի բացառել հենց սկզբից»,- ասել է Միցոտակիսը: «Բայց, ցավոք, ավելի հաճախ նրան մարգինալացնում են սեփական գործողությունները»:
Թուրքիան հայտարարում է, որ Միջերկրական ծովի արեւելյան հսկայական մասերն իրեն են պատկանում եւ ինքը պաշտպանում է Կիպրոսի թուրքերի էներգետիկ իրավունքները Կիպրոսի անջատված շրջանում։
Հունաստանը եւ Կիպրոսը ծովային սահմանի վերաբերյալ համաձայնագրեր են ստորագրել Եգիպտոսի հետ: Նրանք մերժում են Անկարայի կողմից Լիբիայի կառավարության հետ Տրիպոլիում ստորագրված նմանատիպ գործարքը` այն համարելով «ապօրինի»։
Միցոտակիսն ասել է, որ Թուրքիան «սիրիացի վարձկաններ» է տեղակայել Լիբիայում՝ ավելացնելով «ահաբեկչական բջիջների» թիվը հյուսիսային Աֆրիկայում, որոնք սպառնում են Եվրոպայի անվտանգությանը:
Հունաստանի առաջնորդը կրկնել է իր կոչը Եվրամիության գործընկերներին` դադարեցնել զենքի վաճառքը Թուրքիային եւ ի գիտություն ընդունել Անկարայի կողմից ԵՄ-ի հետ մաքսային միության կանոնների «բազմաթիվ խախտումները»։
«Երրորդ երկիրը, որը Եվրամիության անդամ դառնալու թեկնածու է եւ չի կարող ազատվել մաքսատուրքերից, վայելում է ընդհանուր շուկայի առավելությունները եւ միեւնույն ժամանակ սպառնում է Եվրամիության արեւելյան սահմաններին եւ ցնցում առաջացնում Միջերկրական ծովի ողջ տարածքում»,- ասել է Միցոտակիսը:
Անաստասիադեսը բարձր է գնահատել Եգիպտոսին՝ որպես «ԵՄ կարեւոր գործընկեր» եւ «տարածաշրջանային կայունության գործակալ»՝ ահաբեկչության դեմ պայքարի եւ միգրանտների հոսքերը զսպելու նրա ջանքերի համար:
Ալ-Սիսին ասել է, որ թեեւ իր երկիրը հինգ միլիոն փախստական է ընդունում, այն երբեք չի օգտագործել դա ԵՄ-ից քաղաքական կամ տնտեսական օգուտներ ապահովելու համար: Թուրքիան զգալի ֆինանսական օգնություն է ստանում Բրյուսելից, ընդ որում՝ նա բազմիցս սպառնացել է թույլ տալ միգրանտներին Հունաստանի միջոցով մուտք գործել Եվրոպա: