Արցախցի երեք կին, ովքեր մյուսների հետ բողոքի ակցիա էին անում ՀՀ-ում ԱՄՆ դեսպանատան առաջ, քիչ առաջ հանդիպել են դեսպանատան դիվանագիտական բաժնի պետի հետ։ Վերադառնալով հանդիպումից, Լիանա Ադամյանն ասաց, որ իրենց պահանջները ներկայացրել են թե՛ բանավոր, թե՛ գրավոր՝ նամակի տեսքով։
«Նաև հանդիպում պահանջեցինք ՀՀ-ում ԱՄՆ դեսպան Լին Թրեյսիի հետ։ Մենք ընդգծել ենք, որ պատասխանը պիտի արագ լինի և սպասելու ենք դրան, այլապես հնարավոր է մեր հավաքն ավարտվի, բայց մենք նորից ենք գալու, կամ էլ էստեղ վրաններ կդնենք, ու կապրենք, որովհետև մեք ուրիշ տեղ գնալու չունենք, մենք ուրիշ հայրենիք չունենք»,- հայտարարեց Լիանա Ադամյանը։
Արցախի կանայք ԱՄՆ-ից պահանջում են նաև ճանաչել Արցախի Հանրապետության անկախությունը։
«Մենք պահանջում ենք, որ ԱՄՆ-ն անգործ չմնա, զուտ հայտարարություններով հանդես չկա, դրանք մեզ չեն գոհացնում։ Իհարկե, մենք շնորհակալ ենք ԱՄՆ-ում տեղի հայ համայնքի գործունությանը, բայց պահանջում ենք ավելի գոծնական քայլեր պարտադրել և ճանաչել Արցախի անկախությունը, որովհետև Արցախում այսօր ցեղասպանություն է իրականացվում»,- նշեց Լիանա Ադամյանը։
