Այսօր «Հայրենիք» կուսակցության նախագահ, ԱԱԾ նախկին տնօրեն, գեներալ-մայոր Արթուր Վանեցյանը թիկունքային գործով զբաղված տղամարդկանց զինվորագրվելու կոչ արեց: «Հայրենիք» կուսակցության մամուլի քարտուղար Սոս Հակոբյանը 168.am-ի հետ զրույցում ասել է, որ կոչն արդեն իսկ լայն արձագանք է գտել:
«Արդեն բավականին շատ մարդիկ արձագանքել են՝ թե՛ կուսակցության ներսից, թե՛ անծանոթ մարդիկ, որոնք ուղղակի վստահում են Արթուր Վանեցյանին՝ հաշվի առնելով, գնահատելով իր փորձը, անցած ուղին ու կենսագրությունը»,- ասաց Հակոբյանը:
«Հայրենիք» կուսակցության մամուլի քարտուղարի խոսքով՝ Արթուր Վանեցյանն այս պահին Երևանում է և զբաղված է կազմակերպչական աշխատանքներով:
«Հիմա իրականացնում ենք գրանցման փուլը, ըստ օրենքի, կարգի, կան որոշակի փուլեր, որ պետք է անցնի ջոկատը, ինչից հետո կորոշվի, թե ռազմաճակատի ո՞ր մասում և ե՞րբ «Հայրենիք» ջոկատը կանցնի իր հերթապահությանը»,- ասաց նա:
Մեր հարցին, թե Արթուր Վանեցյա՞նն է գլխավորելու «Հայրենիք»-ի ջոկատը, Հակոբյանը պատասխանեց.
«Միանշանակ, Արթուր Վանեցյանը լինելու է ջոկատի հրամանատարը»:
