Ավստրալիայի հայ համայնքը եւ նրա աջակիցները Սիդնեյի Կենտրոնական բիզնես շրջանում (Sydney CBD) այսօր՝ հոկտեմբերի 24-ին ժամը 14:00-ին, բազմամարդ ցույց («Երթ հանուն հայերի») կանցկացնեն՝ ի նշան համերաշխության իրենց եղբայրների եւ քույրերի, որոնք հարձակման տակ են գտնվում Հայաստանում եւ Լեռնային Ղարաբաղում, գրում է greekcitytimes-ը:
«Ինչպես տեսնում ենք պատմության ընթացքում, ագրեսորին իր անունով չկոչելը եւ չդատապարտելը, հատկապես, երբ նրանք ռմբակոծում են քաղաքացիներին եւ բացահայտ էթնիկ բնաջնջմամբ սպառնում, միայն խրախուսում է ագրեսորին շարունակել ռազմական հանցագործությունները»,- նշել է Ավստրալիայի Հայ դատի հանձնախմբի գործադիր տնօրեն Հայկ Կայսերյանը:
Նրա խոսքով՝ հայերը միշտ ասում են «այլեւս երբեք», երբ հիշում են հայերի, հույների եւ ասորիների ցեղասպանությունը 1915-ին: Դա նշանակում է, որ Ավստրալիան պետք է դեմ արտահայտվի էթնիկ բնաջնջումներին եւ ցեղասպանությանը, Ավստրալիան պետք է դեմ լինի բռնապետությանը, Ավստրալիան պետք է դեմ լինի նեոօսմանյան Պանթուրանին:
«Այլեւս երբեք նշանակում է, որ Ավստրալիան պետք է կողմ լինի ժողովրդավարությանը, պետք է կողմ լինի բնիկների իրավունքներին, պետք է կողմ լինի ինքնորոշմանը եւ ազատությանը: Հետեւաբար, այլեւս երբեք նշանակում է, որ Ավստրալիան պետք է կանգնի հանուն Արցախի հանրապետության անկախության», - եզրափակել է Կայսերյանը:
Երթի կազմակերպիչները խորհուրդ են տալիս մասնակիցներին իրենց ավտոմեքենաները ծածկել հայկական դրոշներով եւ հետեւել ոստիկանության հրամաններին: