Հայաստանում ՄԱԿ-ի գրասենյակի ղեկավար Շոմբի Շարփի հետ հանդիպումը բավականին խոստումնալից էր: Այս մասին այսօր` հոկտեմբերի 24-ին, հրավիրված ասուլիսին ասաց «Արցախի կանանց նախաձեռնող խմբի» անդամ Իրինա Սաֆարյանը:
«Բնականաբար Շարփը հայտնեց իր մտահոգությունը, հայտնեց իր մտահոգվածությունը, հայտնեց, որ հասկանում է` ինչ է տեղի ունենում, հայտնեց, որ փորձում են մարդասիրական խողովակ բացել դեպի Արցախ եւ, միգուցե, այդ ձեւով հայտնվեն Արցախում եւ տեսնեն այն ամենը, ինչ կատարվում է Արցախում, սակայն նաեւ գիտենք, որ դրա համար նրան պետք է հրահանգներ տրվեն վերեւից, ինչը մինչեւ հիմա չենք տեսնում, ցավոք սրտի»,- ասաց նա:
Արցախի կանանց նախաձեռնող խմբի» անդամներից Սիրանույշ Սարգսյանն էլ ասաց, որ հաջորդ երկիրը, որին իրենց բողոքի ձայնն են հայտնելու ԱՄՆ-ն է եւ այս երկիրը պատահական չի ընտրվել. «ԱՄՆ-ն հանդիսանում է ԵԱՀԿ Մինսկի խմբի անդամ եւ պատասխանատվություն են կրում հակամարտության կարգավորման համար իրենց չափաբաժնով: Բայց ԱՄն-ն ընտրել ենք նաեւ նրա համար, որ Թուրքիան այս պատերազմում, որը շատ ավելի մեծ ներգրավվածություն ունի, քան մեր անմիջական թշնամի Ադրբեջանը, հանդիսանում է ՆԱՏՕ-ի անդամ եւ հիմնական գործընկեր պետություններից մեկը եւ բոլորովին նորություն չէ, որ ամերիկյան զինամթերքներն են օգտագործվում այսօր Արցախի խաղաղ բնակչության դեմ, ավերում Ստեփանակերտը, մյուս քաղաքները: Եւ այս ամենը իրականացվում է ԱՄՆ-ը օրենսդրությունը խախտելով, որովհետեւ ըստ նրանց օրենքների այդ զինատեսակները չէին կարող հայտնվել այլ երկրներում առանց ԱՄՆ թույլատրության: Այս ամեն ինչ մասին մենք հայտնել ենք դեսպանատան առջեւ կազմակերպած ցույցի ժամանակ հենց դեսպանատան ներկայացուցչին, ինչը, որ նա ընդունել է»:
Սիրանույշ Սարգսյանը հավելեց, որ իրենք նաեւ պահանջում են ԵԱՀԿ խմբի անդամ պետություններից եւ նաեւ այլ պետություներից ճանաչել Արցախի Հանրապետությունը, քանի որ դա է Ադրբեջանին եւ Թուրքիային զսպելու միակ տարբերակը:
«Պետք է սանկցիաներ կիրառել Թուրքիայի դեմ, եւ եթե չեն ճանաչում գոնե հայտարարություն տարածեն, որ եթե Ադրբեջանը չի դադարեցնում ռազմական գործողությունները, իրենք ճանաչելու են: Ես վստահ եմ` այդ օրը իրենք ռազմական գործողությունները դադարեցնելու են»,-ասաց նա:
Նախաձեռնության անդամ Լիանա Ադամյանն էլ հավելեց, որ արցախցի կանայք խաղաղություն են ցանկանում եւ բոլորին կոչ արեց հոկտեմբերի 26-ին , ժամը 11-ին միանալ Եվրոպական միության ներկայացուցչության դիմաց տեղի ունենալիք ցույցին:
