Մեր բոլոր իշխանություններն էլ խնդիրը տեսել են փոխզիջումների մեջ, ուղղակի Ադրբեջանն ամեն անգամ, երբ այդ փոխզիջումը եղել է, եկել մի քիչ ավելին է ուզել: Այս մասին, այսօր՝ հոկտեմբերի 27-ին, Եռաբլուր պանթեոնում լրագրողների հետ զրույցում ասաց «Հանրապետություն» կուսակցության ղեկավար Արամ Զ. Սարգսյանը՝ անդրադառնալով նախօրեին վարչապետ Նիկոլ Փաշինյանի հայտարարությանը, թե մենք պատրաստ ենք անգամ ցավոտ փոխզիջումների:
«Հիմա Ադրբեջանն ուզում է կամ ամբողջը, կամ ոչինչ: Վարչապետի ասածը դա էր: Ինքն ասում էր, որ ինքը պատրաստ է փոխզիջման, ինքը պատրաստ է պատերազմը կանգնեցնելուն, բայց Ալիեւն ուզում է ամբողջը: Եթե կա ուրիշ ելք, բացի կռվելը, ասեք ես էլ իմանամ:
Ինչ վերաբերում է նրան, թե ինչ չափի փոխզիջումների մասին է խոսքը, դրա համար պետք է բանակցության մեջ լինես, պետք է իմանաս իրենք ինչ են ասում, եռանախագահողներն ինչ են ասում, առաջարկություններն ինչ նրբություններ ունեն, խաղաղապահներն ինչպիսի ուժեր են, ինչ ձեւով են կանգնում՝ խնձորաձեւ, ժապավենաձեւ, Հայաստանի սահմանով, մենակ Արցախի սահմանով, ի՞նչ ժամկետներում: Որ ասում են սատանան նրբությունների մեջ է, դա իսկապես այդպես է: Ես չէ, որ այդ հարցին պետք է պատասխանեմ, այդ հարցը պատասխանը ԱԳՆ-ի ու վարչապետի մոտ է»,-ասաց նա:
