Ռուսաստանի Դաշնությունը խորապես մտահոգված է Լեռնային Ղարաբաղի հակամարտության գոտում շարունակվող ռազմական գործողություններով, Մերձավոր Արեւելքից օտարերկրյա վարձկանների ավելի ու ավելի լայնամասշտաբ ներգրավմամբ բախումներում: Այս մասին հոկտեմբերի 29-ին կայացած ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Իրավիճակը Լեռնային Ղարաբաղի հակամարտության գոտում շարունակում է ծանր մնալ, ռազմական առճակատումը պահպանվում է: Շուտափույթ դեէսկալացման եւ բանակցային գործընթացի վերսկսման նպատակով Ռուսաստանը շարունակում է ջանքեր գործադրել ինչպես ազգային մակարդակում, այնպես էլ ԵԱՀԿ Մինսկի խմբի շրջանակներում: Ռուսաստանի Դաշնության նախագահը պարբերաբար շփվում է Ադրբեջանի եւ Հայաստանի ղեկավարների հետ: Լեռնային Ղարաբաղի շուրջ ստեղծված իրավիճակը քննարկվում է Ռուսաստանի ղեկավարի` Թուրքիայի նախագահի հետ զրույցներում: Սերգեյ Լավրովն այն քննարկել է նույն պետության արտաքին գործերի նախարարի, Ֆրանսիայի արտաքին գործերի նախարարի հետ»,- նշել է Մարիա Զախարովան:
«Մենք խորապես մտահոգված ենք շարունակվող ռազմական գործողություններով, Մերձավոր Արեւելքից օտարերկրյա վարձկանների ավելի ու ավելի լայնամասշտաբ ներգրավմամբ բախումներում: Հակամարտող կողմերի տնտեսությունների եւ հասարակությունների համար ծախսերը զգալիորեն աճել են: Համոզված ենք, որ խնդրի խաղաղ լուծումը, ԵԱՀԿ Մինսկի խմբի համանախագահության ջանքերի շրջանակներում բանակցությունները վերսկսելու անհրաժեշտությունն այլընտրանք չունեն: Հոկտեմբերի 23-ին Վաշինգտոնում տեղի ունեցան Հայաստանի եւ Ադրբեջանի արտգործնախարարների առանձին հանդիպումներն ԱՄՆ պետքարտուղարի եւ ԵԱՀԿ Մինսկի խմբի համանախագահների հետ: Կողմերը վերահաստատեցին հոկտեմբերի 26-ին ժամը 8:00-ից հումանիտար զինադադարը վերսկսելու մտադրությունը: Ցավոք, համաշխարհային հանրության կողմից սահմանված ժամկետում ռազմական գործողությունները դադարեցնելու հերթական փորձը հաջողությամբ չպսակվեց: Հետագա քայլերի քննարկման համար պայմանավորվածություն է ձեռք բերվել Հայաստանի եւ Ադրբեջանի արտգործնախարարների` ԵԱՀԿ Մինսկի խմբի համանախագահների հետ հոկտեմբերի 30-ին Ժնեւում կայանալիք հաջորդ հանդիպման վերաբերյալ»,- նշել է Զախարովան: