Ֆրանսիան ունի բավարար քաղաքական կամք և հնարավորություններ շատ արագ զսպելու թուրք ծայրահեղականների հարձակումները հայերի դեմ և չեզոքացնելու իր անվտանգությանը սպառնացող լրջագույն սպառնալիքները։ Նման տեսակետ NEWS.am–ի հետ զրույցում հայտնեց ՀՅԴ Արևմտյան Եվրոպայի Կենտրոնական կոմիտեի ներկայացուցիչ Հրաչ Վարժապետյանը՝ անդրադառնալով վերջին օրերին ֆրանսիական տարբեր քաղաքներում հայերի դեմ թուրքերի իրականացրած հարձակումներին։
«Ֆրանսիայի Վիեն, Լիոն քաղաքներում, որտեղ վերջին օրերին հակահայկական ցույցեր են տեղի ունենում և հարձակումներ հայերի վրա, իսլամական բնակչությունը մի քանի անգամ գերազանցում է հայերին, սակայն դա որևէ նշանակություն չունի Ֆրանսիայի համար։ Ֆրանսիան կայացած պետություն է, այստեղ կան պատկան մարմիններ, օրենք, ոստիկանություն, սա ոչ Ադրբեջանն է, ոչ Թուրքիան, ոչ էլ աշխարհի երրորդ կարգի պետություն, որ ինչ ուզեն անեն։ Այստեղ հարգում են օրենքները, միաժամանակ կա խոսքի ազատություն»,–ասաց նա՝ ընդգծելով, որ Ֆրանսիայի համար անընդունելի է իր տարածքում արյունահեղություն կազմակերպելն ու իրականացնելը։
Իսկ ինչ վերաբերվում է այս օրերին հայ համայնքի իրականացրած խաղաղ հավաքներին կամ բողոքի ակցիաներին, ապա դրանք արտոնված են Ֆրանիսայի ոստիկանության կողմից։
«Թուրքերը լավ գիտեն, որ հայ համայնքը քնած չէ, մեզ չեն կարող ո՛չ վախեցնել, ո՛չ խուճապի մատնել և ոչ էլ մեզ համար սարսափի մթնոլորտ ստեղծել, որովհետև մեր գաղութը բոլոր հնարավորություններն ունի իրեն պաշտպանելու։ Մենք շարունակելու ենք այս երկրում մնալ օրինապաշտ քաղաքացիների մակարդակին, իսկ ցանկացած ոտնձգության դեպքում դիմելու ենք պատկան մարմիններին՝ ոստիկանությանը, որպեսզի կատարեն իրենց գործը և վստահ ենք, որ կկատարեն, քանի որ սա օրենքի երկիր է։ Թուրքերը այս ամենը շատ լավ գիտեն, դրա համար էլ դիմում են սադրանքների»,–ասաց նա։
Վարժապետյանը նշեց, որ հայ համայնքը շարունակելու է գտնվել պետական հովանավորության տակ՝ ակնկալելով իշխանությունների միջամտությունը և աջակցությունը։ Միևնույն ժամանակ նա կոչ արեց Ֆրանիսայում ապրող մեր հայրենակիցներին լինել սառնասիրտ, բայց միևանույն ժամանակ զգոն։
«Չպետք է մոռանանք, որ վերջին հաշվով դիմացինը թուրք է և մենք շատ լավ գիտենք՝ ինչ ասել է թուրք, պետք է լինել զգոն և սադրանքներին չտրվել»,–շեշտեց ֆրանսահայ գործիչը։
Հարցին, թե ներկա իրավիճակում արդյոք Ֆրանսիայի իշխանություններն ի զորու՞ են կանխելու հայերի դեմ հետագա հարձակումները և սաստելու ադրբեջանա–թուրքական սադրանքները՝ հաշվի առնելով այս օրերին իսլամիստների կողմից Ֆրանսիայի նախագահի դեմ իրականացվող ցույցերը, Վարժապետյանն ասաց.
«Իհարկե, վստահ եղեք, որ Ֆրանսիան ունի բավարար քաղաքական կամք և հնարավորություններ շատ արագ զսպելու թուրք ծայրահեղականների այս ալիքը։ Ֆրանսիան թուրքերի կարծած թույլ երկիրը չէ, որ աչք փակի նման երևույթների վրա։ Վերջին հաշվով սա միայն երկու համայնքների խնդիր չէ, սա արդեն Ֆրանսիայի անվտանգության խնդիրն է, քանի որ այս ամենը կատարվում է այդ երկրի տարածքում։ Ֆրանսիային մնում է պարզապես իր երկրի տարածքում կիրառել իր օրենքները և զսպել օրինազանց քաղաքացիներին։ Ոչ միայն Ֆրանսիայի իշխանությունները, այլևս հասարակ ֆրանսիացիները չեն հանդուրժի իրենց երկրում ահաբեկիչների գործունեությանը և օրինազանցություններին։ Համոզված եղեք, որ Ֆրանսիայի դիրքորոշումը կլինի շատ կտրուկ և խիստ»,–շեշտեց Վարժապետյանը։
Մանրամասները՝ NEWS.am–ի տեսանյութում։
