Վրաստանի վարչապետ Գեորգի Գախարիան չի բացառել, որ հանրահավաքի կոչ անելու համար նախկին նախագահ Միխայիլ Սաակաշվիլին կարող է պատասխանատվության ենթարկվել, հաղորդում է «Սպուտնիկ Գրուզիա»-ն:
Իր աջակիցներին ուղղված տեսաուղերձում Սաակաշվիլին ենթադրել է, որ ընտրությունների արդյունքները կկեղծվեն, եւ հայտարարել է, որ դրան «կոշտ պատասխան» կտրվի: «Պատասխանը կլինի պատիվը, իշխանությունը ժողովրդին հանձնումը»,-ասել է նա:
«Այն, ինչ երեկ հայտարարեց նրանց առաջնորդը (Սաակաշվիլին), կոնկրետ գործողությունների փաստացի կոչ էր: Նույնիսկ հեռվից սկայպով արված հայտարարությունը կարող է գնահատվել իրավական տեսանկյունից»,-ասել է Գախարիան:
Նա եւս մեկ անգամ նշել է, որ օրենքի խախտմանը խիստ արձագանք կտրվի:
Վրաստանում խորհրդարանական ընտրություններ կանցկացվեն հոկտեմբերի 31-ին:
Քվեարկության ավարտից հետո «Ուժը միասնության մեջ է» դաշինքը, որի վարչապետի թեկնածուն Սաակաշվիլին է, մտադիր է մեծ ակցիա անցկացնել Թբիլիսիի կենտրոնում: