Նոյեմբերի 1-ից Բելառուսը ժամանակավորապես դադարեցնում է օտարերկրյա քաղաքացիների եւ քաղաքացիություն չունեցող անձանց մուտքի համար սահմանի հատումը, հայտնում է «Sputnik-Բելառուսը»՝ հղում կատարելով Պետական սահմանային կոմիտեին:
Մասնավորապես, հաղորդվում է, որ երկրի նախարարների խորհուրդը որոշում է կայացրել սահմանափակել Բելառուսի սահմանի հատումը՝ կապված COVID-19-ի հետ:
Օտարերկրյա քաղաքացիների եւ քաղաքացիություն չունեցող անձանց մուտքի համար սահմանի հատումը կասեցվել է ավտոճանապարհային անցակետերում, պարզեցված անցակետերում, երկաթուղային կայարանների եւ կայարանների, պետական սահմանի վրա գտնվող գետային նավահանգիստների անցակետերում, հայտնում է ՊՍԿ-ն:
Կան մի շարք բացառություններ, թե քաղաքացիների որ կատեգորիաները ենթակա չեն մուտքի սահմանափակումների: Այսպես, նախկինի պես դիվանագիտական եւ ծառայողական անձնագրերով օտարերկրացիները, պաշտոնական պատվիրակությունների ներկայացուցիչները, միջազգային օգնություն տրամադրող օտարերկրացիները եւ հեռավար բեռնատարների վարորդները կարող են Բելառուս մուտք գործել:
Բացի այդ, սահմանափակումները չեն տարածվում այն օտարերկրացիների վրա, ովքեր Բելառուսի քաղաքացիների ամուսիններ, ծնողներ կամ երեխաներ են եւ ունեն Բելառուսում մշտական կամ ժամանակավոր բնակության իրավունք: Բացի այդ, բացառություն կկազմեն այն օտարերկրյա քաղաքացիները, ովքեր ունեն աշխատանքի թույլտվություն, եւ նրանք, ովքեր մեկնում են Բելառուս մոտ ազգականի ծանր հիվանդության կամ մահվան մասին ծանուցմամբ:
«Բելառուսով տարանցիկ ճանապարհորդող ռուսաստանցիները կկարողանան մուտք գործել: Եթե նրանք ցանկանում են այլ նպատակներով այցելել մեր երկիր, ապա նրանք չեն կարողանա դա անել»,- «Sputnik-Բելառուս»-ին ասել է Պետական սայմանային կոմիտեի պաշտոնական ներկայացուցիչ Անտոն Բիչկովսկին:
Այն անձինք, ովքեր Բելառուս են ժամանում Մինսկի ազգային օդանավակայանի միջոցով, նույնպես չեն ենթարկվում այդ սահմանափակմանը:
Սահմանվել են նաեւ երկրից հեռանալու սահմանափակումներ, դրանք կանդրադառնան բելառուսների եւ օտարերկրյա քաղաքացիություն ունեցող նրանց մերձավոր ազգականների վրա, ովքեր «կորոնավիրուսային վարակի տարածման առումով անբարենպաստ երկրներից Բելառուս ժամանման օրվանից 10 օրացուցային օրվա ընթացքում պետք է լինեն մեկուսացման մեջ»: Նրանց թույլ չի տրվի հատել սահմանը` մինչեւ 10-օրյա կարանտինային ժամկետի ավարտը, ասվում է ՊՍԿ-ի կայքում:
