Գերմանիայի կանցլեր Անգելա Մերկելը հավաստիացրել է տնտեսությանը հետագա աջակցության մասին՝ կորոնավիրուսի համավարակի պատճառով առաջացած ճգնաժամի պայմաններում, հաղորդում է DW-ն:
«Մենք չենք թողնի ճակատագրի ողորմածությունը այն ընկերություններին եւ ձեռնարկություններին, որոնք ոչ իրենց մեղքով խնդիրներ են ունենում ներկայիս ճգնաժամի պայմաններում: Մենք ուզում ենք օգնել արագ եւ առանց բյուրոկրատիայի»,- ասել է նա հոկտեմբերի 31-ին քաղաքացիներին ուղղված ամենշաբաթյա տեսաուղերձում։
Մերկելը հայտարարել է, որ մտադիր է 10 մլրդ եվրո հատկացնել այն ոլորտներին, որոնք կտուժեն կորոնավիրուսի դեմ պայքարի նոյեմբերի 2-ին ներդրված լրացուցիչ միջոցներից:
«Դա էապես գերազանցում է առկա աջակցության ծրագրերը եւ ընդգրկում է նաեւ մշակութային ոլորտը»,- ասել է դաշնային կանցլերը` նշելով, որ հաջորդ շաբաթ հանդիպելու է գործատուների եւ արդյունաբերական արհմիությունների ղեկավարների հետ` քննարկելու «ճգնաժամը մեղմելու հետագա ուղիները»:
«Հավաստիացնում եմ ձեզ՝ դաշնային կառավարությունը կշարունակի անել ամեն ինչ, որպեսզի համավարակից տնտեսությանը, այդպիսով նաեւ աշխատատեղերին եւ մեր բարեկեցությանը հասցվող վնասը սահմանափակվի, միեւնույն ժամանակ՝ ամեն ինչ կանի բոլորիս առողջության պաշտպանության համար»,- ընդգծել է Գերմանիայի կանցլերը:
Միեւնույն ժամանակ, Մերկելը կրկին պաշտպանել է կորոնավիրուսի դեմ պայքարի միջոցառումների խստացումը: «Համավարակի երկրորդ ալիքը ստիպում է մեզ գործել արագ եւ հետեւողական: Մենք պետք է դադարեցնենք վարակների արագ աճը՝ առանց մեր առողջապահական համակարգը ծանրաբեռնելու»,- բացատրել է նաէ զգուշացնելով, որ« գալիք ձմեռը դժվար կլինի»:
Ռոբերտ Կոխի ինստիտուտի տվյալներով, վերջին օրվա ընթացքում Գերմանիայում եւս 19 059 մարդ վարակվել է կորոնավիրուսով: Մահացածների թիվը հասել է 10 452-ի:
