Այս ռազմական գործողությունների ամբողջ ընթացքում այսօր ինձ համար ամենակարեւոր օրերից մեկն է, որովհետեւ հանդիպում եմ լեգենդար Վլադիմիր Բալայանի անվան զորամիավորման զինվորների եւ լեգենդար հրամանատար Շահեն Մեղրյանի անվան զինվորների հետ: Այս մասին, այսօր՝ նոյեմբերի 2-ին, կամավորական այս երկու ստորաբաժանումների հետ հանդիպման ժամանակ նշեց Արցախի նախագահ Արայիկ Հարությունյանը:
«Առաջին կամավորական ջոկատներին կոչում էին Արաբոյի, Տիգրան Մեծի անուններով, այսօր արդեն արցախյան առաջին գոյամարտի հերոսների անուններով:
Այդ հերոսների տղաները, բարեկամները այդ հերոսների սերունդն է այսօր պայքարում աշխարհում ամենաժամանակակից սպառազինություն ունեցող բանակի դեմ: Ոչ միայն կռվում, պայքարում, այլեւ պատժում, ոչնչացնում եւ դա անում ի լուր աշխարհի: Մեր դեմ կռվում են Թուրքիան, տարբեր երկրներից ժամանակ վարձկաններ, եւ իհարկե, Ադրբեջանը:
Այսօր նույն Վլադիմիր Բալայանի անվան ջոկատի, զորամիավորման 5 հոգանոց խմբին հաջողվել է հերթական ապացույցը ունենալ եւ աշխարհին ցույց տալ, որ մենք կռվում ենք վարձկանների դեմ:
Իսկ Մեղրյանի անվան խումբը մի քանի օր անընդհատ պայքարում էր ադրբեջանական, թուրքական ամենաէլիտար հատուկ ստորաբաժանումների դեմ Սղնախ, Ավետարանոց հատվածում»,-ասաց նա:
Արցախի նախագահ Արայիկ Հարությունյանը «Արիության համար» մեդալով հետմահու պարգևատրեց Շահեն Մեղրյանի անվան ջոկատի կամավորներ՝ Գևորգ Կիրակոսյանին, Մխիթար Գրիգորյանին, Էրիկ Պողոսյանին, Հրայր Ասրյանին և Էդիկ Հայրապետյանին:
Նախագահ Հարությունյանն ընդգծել է՝ այս պատերազմում, Արցախի պաշտպանները քայլում են Արցախյան ազատամարտի լեգենդար հրամանատարների օրինակով՝ նրանց պես անմնացորդ նվիրվելով ամենամեծ արժեքի՝ հայրենիքի պաշտպանությանը: