Պաշտպանության ոլորտում ծրագրվում է գիտահետազոտական եւ նախագծման աշխատանքներ անցկացնել: Այս մասին այսօր՝ նոյեմբերի 3-ին, ԱԺ ֆինանսավարկային եւ բյուջետային, ինչպես նաեւ տնտեսական հարցերի մշտական հանձնաժողովների համատեղ նիստում 2021 թվականի բյուջեի նախագծի քննարկման ժամանակ հայտարարեց բարձր տեխնոլոգիական արդյունաբերության նախարար Հակոբ Արշակյանը:
Նրա խոսքով՝ ծրագրվում է բարձրացնել կիբերանվտանգության մակարդակն ու ինտերնետ հասանելիությունը:
«Նշված նպատակների իրականացման համար կանցկացվի «Համալսարանական-մասնավոր գործընկերություն» մասնագետների վերապատրաստման ծրագիր 380 մլն դրամ արժողությամբ, «Գաղափարից դեպի բիզնես» դրամաշնորհային ծրագիր 1 մլրդ դրամ արժողությամբ, «Հայկական վիրտուալ կամուրջ» ծրագիր, որը թույլ կտա վիրտուալ կամուրջ ստեղծել տեղական ստարտափ ընկերությունների եւ այլ երկրներից նման ընկերությունների միջեւ: Տվյալ ծրագիրը կարժենա 1,18 մլրդ դրամ»,-պարզաբանեց նախարարը:
