Արցախի հայերի նկատմամբ Բաքվի կողմից իրականացվող էթնիկ զտումների ապացույցներն ուղարկվել են ՄԱԿ, ՄԻԵԴ եւ միջազգային այլ կազմակերպություններ: Այս մասին այսօր ԱԺ ֆինանսավարկային եւ բյուջետային հարցերի մշտական հանձնաժողովների համատեղ նիստում 2021 թվականի բյուջեի նախագծի քննարկման ժամանակ հայտարարեց ՀՀ օմբուդսմեն Արման Թաթոյանը:
Նրա խոսքով՝ կարեւոր է նշել, որ այդ գործողություններին աջակցում են բարձր քաղաքական մակարդակով:
«Կան ապացույցներ, որ Ադրբեջանի կողմից օգտագործվող վարձկան ահաբեկիչները պատրաստ են շարունակել իրենց գործողությունները նաեւ այլ երկրներում: Տեսանյութերից մեկում զինյալը՝ մեծ քանակությամբ զենքի կողքը կանգնած, ասում է. «Ցավոք, մենք նման զենքեր չունեինք Սիրիայում, դրանք մեզ հետ կտանենք»»,-հայտնեց Թաթոյանը:
Ընդ որում, նա նշեց, որ այդ տվյալները օմբուդսմենի գրասենյակը փոխանցել է հանրապետության ԱԳՆ-ին, ՄԻԵԴ-ում Հայաստանի ներկայացուցչությանը, ինչպես նաեւ Ժնեւում ՄԱԿ-ի Մարդու իրավունքների հարցերով խորհրդին:
«Բնականաբար, օմբուդսմենի գրասենյակը կապի մեջ է Արցախից իր գործընկերների հետ»,-հավելեց Թաթոյանը:
