Կորոնավիրուսի զսպման նպատակով Իտալիայում ներդրված վերջին սահմանափակումները ներառում են նաեւ դրա ամենահարուստ եւ բնակեցված շրջանի` Լոմբարդիայի եւ մայրաքաղաք Միլանի մասնակի մեկուսացումը:
Ավելի վաղ կառավարությունը հրապարակել էր ազգային սահմանափակումների նոր փաթեթը` ըստ որի երկիրը, համավարակի ինտենսիվությունից կախված, բաժանվում է երեք գոտու` կարմիր, նարնջագույն եւ դեղին, հայտնում է AP-ն:
Գոտիավորումը կախված է բազմաթիվ գործոններից, այդ թվում` տեղական ինֆեկցիաների մակարդակից եւ հիվանդանոցային ծանրաբեռնվածությունից:
Խստորեն տուժած կարմիր գոտիներում մարդկանց թույլատրվում է լքել իրենց տները միայն աշխատանքի գնալու, առողջական պատճառով կամ արտակարգ իրավիճակներում, բարերը, ռեստորանները եւ խանութների մեծ մասը փակ կլինեն:
Նարնջագույն գոտիներում խանութները բաց կմնան, եւ մարդիկ կարող են ազատորեն տեղաշարժվել քաղաքում, սակայն` չլքել այն. դա Ապուլիան է եւ Սիցիլիա կղզին:
Երկրի մյուս 20 մարզերը, այդ թվում` Լացիոն, գտնվում են դեղին գոտում, ինչը նշանակում է, որ ամբողջ երկրում ներդրված սահմանափակումներից բացի, այլ սահմանափակումներ չկան:
Համապետական սահմանափակումների համաձայն` անկախ գոտիավորումից, ռեստորաններն ու բարերը պետք է փակվեն երեկոյան 18:00-ին, կինոթատրոնները, ռեստորանները, թանգարաններն ու մարզադահլիճները փակ են, իսկ հանգստյան օրերին առեւտրի կենտրոնները փակ են:
Ավագ դպրոցում բոլոր դասընթացները պետք է անցկացվեն առցանց, իսկ փոքր տարիքի երեխաներին թույլատրվում է անձամբ հաճախել դպրոց:
