Ինչ որ պետք է արվում է, ավելին չեմ կարող ասել: Այս մասին, այսօր՝ նոյեմբերի 5-ին, ԱԺ-ում լրագրողների հետ ճեպազրույցում ասաց Հայաստանի ԱԳ փոխնախարար Շավարշ Քոչարյանը՝ անդրադառնալով հարցին, թե արդյոք Հայաստանի եւ Ռուսաստանի միջեւ խորհրդակցությունները սկսվել եւ են որքան են տեւելու:
Հարցին, թե ինչ խորհրդակցություններ են հիմա ընթանում, ովքեր են դրանք վարում եւ ինչ պտուղներ են դրանք տալու, ԱԳ փոխնախարարը պատասխանեց. «Դուք պատկերացնում եք, որ խոսքը վերաբերում է այն էլ պատերազմի ժամանակ անվտանգությանը: Դուք ենթադրում եք, որ ես պետք է ասեմ, թե ով է խորհրդակցել, ում հետ, ինչ են պայմանավորվե՞լ:
Դիմումը եղել է. պայմանագրի երկրորդ հոդվածն ասում է, որ պետք է սկսվեն խորհրդակցություններ եւ կողմերը պետք է համատեղ ջանքեր գործադրեն: Դրանից ավել ես չեմ կարող ասել:
Պատերազմի ժամանակ ես ձեզ խորհուրդ կտամ՝ ավելի լավ է փորձեք ձեր հարցերով, ձեր գործունեությամբ նպաստեք հասարակության համախմբմանը: Մենք պատերազմում ենք»,-վրդովված ասաց նա ու հեռացավ:
Իսկ հեռանալիս հարցին, թե հաղթանակը որն է, նա արձագանքեց. «Հաղթանակը նա է, որ հակառակորդը պարտվի»:
Ավելի վաղ NEWS.am-ը հայտնել էր, որ ՀՀ վարչապետ Նիկոլ Փաշինյանը հոկտեմբերի 31-ին դիմել էր ՌԴ նախագահ Պուտինին սկսելու անհապաղ խորհրդակցություններ՝ սահմանելու աջակցության տեսակները և չափը, որը Ռուսաստանի Դաշնությունը կարող է հատկացնել Հայաստանի Հանրապետությանը՝ իր անվտանգության ապահովման համար:
Ռուսաստանի ԱԳն-ից ստացվել էր պատասխան, որ ՌԴ-ն կկատարի իր պայմանագրային պարտավորությունները, եթե ռազմական գործողությունները տեղի ունենան Հայաստանի տարածքում:
