Հաջորդ տարվա ընթացքում կկիրառվի ԵԱՏՄ անդամ երկրների ապրանքների տարանցման նոր ռեժիմը: Այս մասին նոյեմբերի 5-ին Ազգային ժողովում ֆինանսավարկային եւ բյուջետային հարցերի, ինչպես նաեւ տարածաշրջանային հարցերի եւ եվրասիական ինտեգրման հարցերի մշտական խորհրդարանական հանձնաժողովների համատեղ նիստին 2021 թվականի բյուջեի նախագծի քննարկման ժամանակ ասաց ՀՀ էկոնոմիկայի նախարար Տիգրան Խաչատրյանը:
Խոսքը սահմանային անցակետերը հատելիս էլեկտրոնային նավիգացիոն կնիքների կիրառմամբ ապրանքների ավելի պարզեցված տեղաշարժի մասին է:
«Սա թույլ կտա մեր ապրանքներին ավելի արագ տեղաշարժվել դեպի Եվրասիական տնտեսական միության տարածք Վերին Լարսի անցակետով, ինչը կենսական նշանակություն ունի մեր առեւտրի համար: Դրա շնորհիվ ապրանքները ներկայումս կիրառվող որոշակի ընթացակարգերի չեն ենթարկվի»,- ասաց նախարարը:
Նա նաեւ նշեց, որ 2021 թվականին նախատեսվում է Իրանի հետ աշխատանքներ սկսել ազատ առեւտրի գոտու ստեղծման մասին համաձայնագրի շուրջ: