Գերմանիայում ահաբեկչությունների սպառնալիքը շարունակում է բարձր մնալ, եւ հարձակում կարող է տեղի ունենալ ցանկացած պահի: Այսպիսի կարծիք է հինգշաբթի օրը հայտնել ԳԴՀ ՆԳՆ ղեկավար Հորստ Զեեհոֆերը՝ ելույթ ունենալով Բունդեսթագում իսլամական ահաբեկչությանը հակազդելու թեմային նվիրված հանդիպմանը, հայտնում է ՏԱՍՍ-ը:
«Սպառնալիքը մեր երկրում մեծ է: Պետք է ելնենք նրանից, որ ցանկացած պահի կարող են տեղի ունենալ ահաբեկչություններ»,- ասել է նախարարը: Նրա կարծիքով, ահաբեկչության դեմ արդյունավետ պայքարի համար անհրաժեշտ է ակտիվացնել համագործակցությունը ԵՄ շրջանակներում: Զեեհոֆերն ասել է, որ այս թեման հիմնականը կլինի նոյեմբերի 13-ին ԵՄ երկրների ՆԳ նախարարների հանդիպմանը:
Միաժամանակ, նախարարը նախազգուշացրել է հապճեպ եզրակացություններ չանել՝ Վիեննայում տեղի ունեցած ահաբեկչությունից եւ օրենսդրության խստացումից հետո: «Ես ձեզ խորհուրդ եմ տալիս զերծ մնալ հապճեպ եզրակացություններից»,- ասել է նա: Նրա կարծիքով, ներքին անվտանգության ոլորտում գործող օրենքները պետք է հետեւողականորեն կիրառվեն: Զեեհոֆերը նաեւ ասել է, որ ԳԴՀ-ում հավանական վտանգավոր 615 իսլամիստների մեծ մասը կամ Գերմանիայի քաղաքացիներ են, կամ երկքաղաքացիություն ունեցող անձինք:
«Ահաբեկչության դեմ մեր պայքարն ուղղված է ֆանատիկորեն տրամադրված եւ բռնության վրա հիմնված ծայրահեղականության դեմ, այլ ոչ թե իսլամի»,- ասել է Գերմանիայի ՆԳՆ ղեկավարը:
Ավստրիայի մայրաքաղաք Վիեննայում նոյեմբերի 2-ին հրաձգություն էր տեղի ունեցել վեց վայրերում, այդ թվում՝ սինագոգի մոտ: Հարձակման հետեւանքով չորս մարդ զոհվել է, 22-ը՝ վիրավորվել: Զինված հանցագործը սպանվել է ոստիկանության կողմից, նա ահաբեկչական «ԻՊ» խմբավորման կողմնակից էր: Ոստիկանությունը որոնում է նրա հավանական հանցակիցներին: Ավստրիայի իշխանությունները կատարվածը ահաբեկչություն են որակել:
