Հավաքական անվտանգության պայմանագրի կազմակերպությունը (ՀԱՊԿ) ողջունում է Լեռնային Ղարաբաղի հակամարտության գոտում ռազմական գործողությունների դադարեցումը։ Այս մասին լրագրողներին ասել է ՀԱՊԿ գլխավոր քարտուղար Ստանիսլավ Զասը, փոխանցում է ՏԱՍՍ-ը։
«Մենք դրական ենք գնահատում Լեռնային Ղարաբաղ հակամարտության գոտում ռազմական գործողությունների դադարեցման փաստը։ Սա հնարավոր դարձավ նոյեմբերի 9-ին Ռուսաստանի, Ադրբեջանի նախագահների եւ Հայաստանի վարչապետի կողմից համապատասխան հայտարարության ստորագրումից հետո։ Ողջունում ենք բոլոր գործողությունները, որոնք տանում են տարածաշրջանում խաղաղության հաստատման եւ արյունահեղության դադարեցման։ ՀԱՊԿ-ը բազմիցս հակամարտող կողմերին կոչ է արել վերադառնալ հրադադարի ռեժիմին եւ Լեռնային Ղարաբաղի հակամարտության կարգավորմանը բացառապես խաղաղ բանակցությունների ճանապարհով»,- ասել է նա։
ՀԱՊԿ գլխավոր քարտուղարը նաեւ դրական է գնահատել տարածաշրջան խաղաղապահ զորակազմի տեղակայումը։ «Կարծում ենք, որ խաղաղապահների տեղակայումը հակամարտող կողմերի կողմից ուժի կիրառման զգալի զսպման գործոն կլինի։ Կրկին հիշեցնում ենք, որ Լեռնային Ղարաբաղի հակամարտության լուծումը հնարավոր է միայն քաղաքական-դիվանագիտական մեթոդներով»,- նշել է Զասը։
