ՀՀ-ում ԱՄՆ դեսպանատան դիմաց հավաքված հադրութցիներին ընդունել է դեսպանատան աշխատակիցը, ով լսել է նրանց մտահոգությունները եւ հայտնել, որ դեսպանը շահագրգռված է խնդրի հանգուցալուծմամբ եւ օրերս քննարկում է հրավիրելու, որին կարող են մասնակցել նաեւ նրանք։ Այս մասին ԱՄՆ դեսպանատան դիմաց լրագրողների հետ զրույցում ասացին հադրութցի կանայք։
Դեսպանին ուղղված նամակը հադրութցիները փոխանցել են դեսպանատան աշխատակցին։ Նրանք պահանջում են դեօկուպացնել Հադրութը ադրբեջանական տեռորիստական պետությունից։
«Հադրութը միշտ եղել է հայկական։ Եթե այս տարիների ընթացքում բանակցային գործընթացի լոգիկան եղել է փոխադարձ զիջումները, եւ մեզ ռազմի դաշտում դա չհաջողվեց անել, ապա պետք սեղանի շուրջ քննարկել այն հարցը, որ Հադրութը պետք է լինի Արցախի Հանրապետության տարածքում»,- նշեց ակցիայի մասնակիցներից մեկը։
