ԱՄՆ գործող նախագահ Դոնալդ Թրամփն ուրբաթ նշել է, որ Դեմոկրատական կուսակցության ներկայացուցիչները, որոնք ավելի վաղ պնդում էին, որ ԱՄՆ ընտրական համակարգը միշտ անարդար է եղել, 2020 թվականի նախագահական ընտրություններն անցկացնելուց հետո փոխել է իր կարծիքն ու պնդում է հակառակը, հաղորդում է ՏԱՍՍ-ը:
«Տարիներ շարունակ դեմոկրատրները պնդել են, թե որքան անարդար եւ կեղծված են եղել մեր ընտրությունները: Այժմ նրանք ասում են, թե ինչպիսի հիանալի աշխատանք է իրականացրել Թրամփի վարչակազմը, որպեսզի 2020 թվականի ընտրությունները լինեն ամենաանվտանգն ամբողջ ժամանակաշրջանում: Իրականում դա ճիշտ չէ, եթե ուշադրությունը սեւեռենք այն բանին, թե ինչ են արել դեմոկրատները»,-գրել է Սպիտակ տան ղեկավարը թվիթերյան իր էջում: Նա նաեւ անվանել է «կեղծված» անցկացված ընտրությունները:
ԱՄՆ-ում համընդհանուր ընտրություններն անցկացվել են նոյեմբերի 3-ին: Համաձայն առաջատար ամերիկյան ԶԼՄ-ների գնահատականների՝ դեմոկրատների թեկնածու Ջո Բայդենը ստացել է ավելի քան 270 ընտրիչների աջակցությունը, որոնց ձայներն անհրաժեշտ են հաղթանակի համար: Բայդենը հայտարարել է ընտրություններում իր հաղթանակի մասին: Երկրորդ ժամկետի համար առաջադրված Թրամփը չի ընդունել իր պարտությունը եւ հայտարարել է դատարան դիմելու որոշման մասին ընտրողների ձայների վերահաշվարկը պահանջելու հայցով, քանի որ, նրա կարծիքով, ընտրություններին տեղի են ունեցել բազմաթիվ խախտումներ դեմոկրատների կողմից: