Նիդեռլանդների արտաքին գործերի նախարար Ստեֆ Բլոկը ցանկանում է աջակցություն ցուցաբերել Եվրամիությանը` ՆԱՏՕ-ի իր դաշնակից Թուրքիայի դեմ զենքի էմբարգո սահմանելու համար, հայտնում է նիդեռլանդական NOS պարբերականը:
Իշխող չորս կողմերը նման խնդրանքով են դիմել` տարածաշրջանում տարբեր հակամարտություններին, այդ թվում` Հայաստանի եւ Ադրբեջանի միջև Լեռնային Ղարաբաղի հակամարտությանը Թուրքիայի մասնակցության պատճառով:
Այս շաբաթ արտաքին գործերի նախարարության բյուջեի քննարկման ժամանակ նրանք հանդես են եկել համապատասխան առաջարկով:
Բացի այդ, ըստ նրանց, Անկարայի կառավարությունը խախտում է միջազգային իրավունքը` մասնակցելով զինված բախումներին Լիբիայում եւ Արեւելյան Միջերկրական ծովում: Այնտեղ Թուրքիան նավթի որոնման աշխատանքներ է իրականացնում Հունաստանին պատկանող տարածքներում:
Ուշ երեկոյան, Ներկայացուցիչների պալատի խնդրանքով, նախարար Բլոկը հայտարարել է, որ կցանկանար ստանալ իր եվրոպացի գործընկերների աջակցությունը:
Ըստ կոալիցիայի գործընկերների` նախարարների կաբինետը ԵՄ համատեքստում պետք է անի հնարավոր ամեն ինչ` զենքի էմբարգո սահմանելու համար:
«Թուրքիան կրկին ու կրկին անցել է բոլոր սահմանները: Այժմ վճռական գործողությունների ժամանակն է»,- ասել է առաջարկի հեղինակ, խորհրդարանի` Voordewind քրիստոնեական միությունից պատգամավորը:
Նրա խոսքով` Թուրքիան սիրիացի ջիհադիստների է ուղարկել Լեռնային Ղարաբաղ` պատերազմին մասնակցելու համար: