«Գազպրոմ»-ը Թուրքիային գազի վաճառքի ռեկորդ է սահմանել, գրում է «Վեդոմոստի» պարբերականը՝ հղում անելով երրորդ եռամսյակում ընկերության զեկույցին եւ Դաշնային մաքսային ծառայությանը: Սեպտեմբերին այդ երկիր արտահանման ծավալները կազմել են 1,9 մլրդ խորանարդ մետր վառելիք:
Ցուցանիշը էապես գերազանցում է անցած տարվա նույն ժամանակահատվածի արդյունքները, երբ Թուրքիային վաճառվել է ընդամենը 1,017 մլրդ խորանարդ մետր գազ: Ընդ որում, 2020 թվականի առաջին 9 ամիսներին մատակարարումները կազմել են 8,854 մլրդ խորանարդ մետր, ինչը 25 տոկոսով ցածր է անցած տարի նույն ժամանակահատվածի համեմատ:
Վերլուծաբանները այդ իրավիճակը կապում են թուրք գնորդների հետ «Գազպրոմի» հարաբերությունների բնույթի հետ, որոնք կառուցվել են երկարաժամկետ պայմանագրերի, առավել հին եւ ճկուն գնաձեւավորման սխեմայի հիման վրա:
Սակայն աշնանը «Գազպրոմի» հետ երկարաժամկետ պայմանագրով գինը սկսել է նվազել՝ արձագանքելով նավթային արժենշման գարնանային անկմանը: Դա «Գազպրոմի» մատակարարումները դարձրել է ավելի շահավետ կանխիկ գնումների համեմատությամբ, իսկ եվրոպական հարթակներում, հակառակը, սկսել են աճել վառելիքի սեզոնային պահանջարկի մեծացման պատճառով:
Վերլուծաբանները նշում են, որ թուրքական շուկան չափազանց կարեւոր է «Գազպրոմի» համար, քանի որ այն ավանդաբար համարվում է վաճառքների եւ եկամուտի ծավալներով երկրորդը գերմանականից հետո: Եվրոպա մատակարարումները եւս էապես կրճատվել են ընթացիկ տարվա 9 ամիսների ընթացքում եւ կազմել 125,7 մլրդ խորանարդ մետր, ինչը 13,6 տոկոսով ցածր է անցած տարվա ցուցանիշներից:
