Երեւանը չէր կարող ՀԱՊԿ երկրներին ներգրավել Ղարաբաղում հակամարտության կարգավորման գործընթացում, քանի որ այս տարածաշրջանը Հայաստանի տարածք չէ, բայց հանրապետությունը «լքված եւ մոռացված» չէր: Այս մասին հայտարարել է Ռուսաստանի նախագահ Վլադիմիր Պուտինը, հայտնում է ՏԱՍՍ-ը:
Նա հիշեցրել է, որ Հայաստանը չի ճանաչել Ղարաբաղի անկախությունը, այսինքն՝ միջազգային իրավունքի տեսակետից այդ տարածքները Ադրբեջանի մաս են կազմել եւ կազմում են:
«Հավաքական անվտանգության պայմանագիրը նախատեսում է փոխօգնություն պայմանագրի մասնակից երկրի տարածքների դեմ ագրեսիայի դեպքում: Ոչ ոք ոտնձգություն չի կատարել Հայաստանի տարածքի նկատմամբ, եւ դա իրավունք չէր տալիս ուղղակիորեն մասնակցել այդ ռազմական գործողություններին»,- ասել է Պուտինը: «Բայց հավաստիացնում եմ ձեզ, որ Հայաստանն իրեն լքված եւ մոռացված չի զգացել, Ռուսաստանն ամեն ինչ արել է, որ դա տեղի չունենա»,- հավելել է ՌԴ ղեկավարը:
«Ռուսաստանի Դաշնությունը բազմակողմ եւ երկկողմ պարտավորությունների շրջանակներում, այդ թվում՝ ռազմատեխնիկական համագործակցության ոլորտում, ամբողջությամբ կատարել է իր բոլոր պարտավորությունները: Ինչի համար Հայաստանի ղեկավարությունը, այդ թվում՝ ի դեմս վարչապետ (Նիկոլ) Փաշինյանի, բազմիցս շնորհակալություն է հայտնել եւ ընդգծել է, որ Ռուսաստանը, իր պարտավորությունների համաձայն, կատարում է այս ոլորտում բոլոր պարտավորությունները»:
