«Վոեննի օբոզրեվատել» թելեգրամ-ալիքի տվյալներով՝ Ուկրաինայի զինված ուժերը Դոնբասում «Միավորված ուժեր» օպերացիայի անցկացման գոտում թուրքական Bayraktar TB2 անօդաչու թռչող սարքեր են տեղակայել: Նշվում է, որ թուրքական արտադրության 6 անօդաչու է տեղափոխվել Կրամատորսկ: Կարճ հաղոդրագրության մեջ այլ մանրամասներ կամ հղումներ չեն մեջբերվում:
Նմանատիպ տեղեկություն է նոյեմբերի 18-ին տարածել «Չերգովի» թելեգրամ-ալիքը:
«Լեռնային Ղարաբաղում վերջին զինված հակամարտության ժամանակ ադրբեջանական բանակն արդյունավետորեն կիրառել է թուրքական Bayraktar TB2 անօդաչուները: Դրանից անմիջապես հետո փորձագետները սկսեցին խոսել այն մասին, որ ուկրաինացի «ռազմավարները» կարող են օգտվել Ադրբեջանի հաջող փորձից եւ ԱԹՍ-ներ կիրառել Դոնբասի ինքնահռչակ հանրապետությունների դեմ կամ էլ «Ղրիմը վերադարձնելու» համար»,-գրում է Eadaily-ն:
Նման ենթադրությունները լուրջ հիմքեր ունեն՝ հաշվի առնելով Անկարայի եւ Բաքվի հետ Կիեւի սերտ կապերը: Բավական է հիշել հոկտեմբերին Ուկրաինայի նախագահ Վլադիմիր Զելենսկու այցը Թուրքիա (նկատենք՝ Ղարաբաղում մարտական գործողությունների թեժ շրջանում), որի ընթացքում երկու երկրների միջեւ ռազմական համագործակցության մասին համաձայնագիր ստորագրվեց:
