Եվրամիությունում գոյություն ունեցող միգրացիայի վերահսկման համակարգերը դադարել են աշխատել եւ շուտափույթ վերակազմավորման կարիք ունեն: Այս մասին հինգշաբթի օրը հայտարարել է Եվրահանձնաժողովի ղեկավար Ուրսուլա ֆոն դեր Լյայենը` ելույթ ունենալով Եվրախորհրդարանում միգրացիայի վերաբերյալ լսումների ժամանակ, փոխանցում է ՏԱՍՍ-ը:
«ԵՄ-ում միգրացիոն համակարգերն այլեւս չեն գործում, ժամանակն է ընդունել դա»,- ասել է նա` կոչ անելով ԵՄ բոլոր երկրներին աջակցել միգրացիոն եվրոպական նորմերի վերանայման ԵՀ-ի առաջարկներին:
Այս բարեփոխման նախագիծը ներկայացվել էր սեպտեմբերի 23-ին, եւ դրա հիմնական առաջարկն է հրաժարվել Դուբլինի ներկայիս համակարգից, համաձայն որի յուրաքանչյուր կոնկրետ միգրանտի ընդունման եւ տեղակայման կամ հայրենադարձության համար պարտավոր է պատասխանատվություն ստանձնել ԵՄ այն երկիրը, որի տարածք այդ մարդն առաջին անգամ ժամանել է Եվրամիության սահմաններից դուրս: Եվրահանձնաժողովն առաջարկել է միգրանտների ընդունման տեղակայման եւ հայրենադարձության համար պատասխանատվությունն ընդհանուր եվրոպական խնդիր դարձնել, ինչը համայնքի բոլոր պետությունների, այդ թվում հիմնական միգրացիոն ուղիներից դուրս գտնվողների, մասնավորապես` Արեւելյան Եվրոպայի երկրների պարտավորություն է ենթադրում` ԵՄ ամենախնդրահարույց երկրներից` Հունաստանից, Իտալիայից եւ Իսպանիայից ներգաղթյալներին ընդունման համար:
«ԵՄ բոլոր երկրները պետք է աջակցեն բարձր [միգրացիոն] ճնշման են ենթարկված պետություններին: Եվրամիությունը պետք է մնա իր մարդասիրական պարտավորությունների մակարդակում»,- ընդգծել է ֆոն դեր Լյայենը:
Իր խոսքում Եվրամիության միգրացիոն ճգնաժամը նա ներկայացրել է պարզ սխեմայի տեսքով. «Քաղաքական ապաստան կամ ավելի լավ կյանք գտնելու համար մարդիկ լքում են իրենց տները եւ ընկնում դաժան մաքսանենգների ձեռքը, ինչը բազմաթիվ ողբերգությունների է հանգեցնում (միգրանտների մահը Միջերկրական ծովի ծովային անցումներին չհարմարեցված նավակներով)»: Ֆոն դեր Լյայենը հիշեցրել է, որ Եվրահանձնաժողովը նաեւ առաջարկում է «ապաստանի տրամադրման եւ դրա իրավունք չունեցող անձանց հայրենադարձության հստակ համակարգ» ընդունել եվրոպական մակարդակով: Բացի այդ, Եվրահանձնաժողովն առաջարկել է օպտիմալ պայմաններ ստեղծել օրինական միգրացիայի համար, որպեսզի մարդիկ, ովքեր օրինական ճանապարհով գալիս են Եվրոպա, իրենց ցանկալի հյուր զգան: