Հայաստանի եւ Վրաստանի երկկողմ հարաբերությունները չեն վերաբերում երրորդ երկրներին եւ պայմանավորված չեն երրորդ երկրների հետ հարաբերություններով: Այդ մասին մամուլի ասուլիսում հայտարարել է Հայաստանում Վրաստանի դեսպան Թենգիզ Շարմանիշվիլին:
Վրացի դիվանագետն ընդգծել է, թե Երեւանի եւ Թբիլիսիի միջեւ ներկայումս ձեւավորված հարաբերությունները գտնվում են այնպիսի մակարդակի վրա, ինչպիսին չեն եղել անկախության 20 տարիների ընթացքում: Շատ ակտիվ քաղաքական երկխոսություն է ընթանում, երկու երկրների ղեկավարները հաճախ եւ առարկայական շփվում են, իսկ նրանց միջեւ առկա են ոչ միայն գործնական, այլեւ լավ մարդկային հարաբերություններ: Կառավարությունների միջեւ եւս համագործակցության բարձր մակարդակ է, կողմերը պարբերաբար փոխանակվում են այցերով:
Դեսպանը հիշեցրել է Սերժ Սարգսյանի խոսքերը, թե երկրների միջեւ չկան, հարցեր, որոնք հնարավոր չէ լուծել բանակցությունների սեղանի շուրջ: