Apple-ը ամերիկյան 34 նահանգների 113 մլն դոլար կվճարի iOS-ի նոր տարբերակի թողարկումից հետո հին iPhone-ների աշխատանքի դանդաղելու վերաբերյալ հայցի շրջանակում։ 2020 թվականի մարտին ընկերությունն արդեն համաձայնվել էր հին սմարթֆոնների տերերին որպես փոխհատուցում ուղարկել ընդհանուր 500 մլն դոլար։ Ընդ որում՝ Apple-ը չի ընդունել չարաշահումների առկայությունը, նշում է «Կոմերսանտ»-ը։
«Ընկերությունը պետք է դադարեցնի սպառողների մանիպուլացումը եւ նրանց հայտնի աշխատանքի իր մեթոդների ու արտադրանքի մասին ամբողջ ճշմարտությունը։ Ես պարտավորվում եմ պատասխանատվության կանչել այս տեխնոլոգիական ընկերություն-հսկաներին, եթե նրանք իրենց օգտատերերից ճշմարտությունը թաքցնում են»,- ասել է Արիզոնայի գլխավոր դատախազ Մարկ Բրնովիչը որոշումը հրապարակելուց հետո։
Լրացուցիչ վճարումների մասին համատեղ որոշումը ընդունել են 34 նահանգների գլխավոր դատախազները։ Apple-ը հրաժարվել է մեկնաբանել դատավճիռը։
Apple-ի հետ վեճը սկսվել է 2017 թվականից։ Այդ ժամանակ iPhone 6, 6s, 7, SE, ինչպես նաեւ Plus հավաքածուի տերերը նկատել էին, որ իրենց սմարթֆոնները սկսել են դանդաղ աշխատել՝ iOS-ը, կարծես, սահմանափակում էր պրոցեսորի աշխատանքի արագությունը, որ երկարացնի մարտկոցի ծառայելու ժամկետը։ Apple-ն ավելի ուշ խոստովանել էր, որ դիտավորյալ է նվազեցրել մարտկոցի ծանրաբեռնվածությունը։