(Հայաստանի ղեկավարության հետ այսօրվա հանդիպումների ընթացքում - խմբ.) հատուկ ուշադրություն է դարձվել միջազգային աջակցությանը, նոյեմբերի 9-ի համաձայնագրի իրագործումը հեշտացնելու համար միջազգային աջակցությունը մոբիլիզացնելու անհրաժեշտությանը: Այս մասին նոյեմբերի 21-ին Երեւանում կայացած ճեպազրույցի ժամանակ հայտարարեց Ռուսաստանի արտաքին գործերի նախարար Սերգեյ Լավրովը:
«Կարմիր խաչի միջազգային կոմիտեն այստեղ արդեն ակտիվորեն աշխատում է: Մենք շահագրգռված ենք, որ ՄԱԿ-ի համակարգի կազմակերպությունները համապատասխան նախաձեռնություն ցուցաբերեն»,- հավելեց ՌԴ ԱԳՆ ղեկավարը:
Նախարարի խոսքով, այս կապակցությամբ դիմում է ստացվել ՄԱԿ Գլխավոր քարտուղար Անտոնիո Գուտերեշից, կա նույնպիսի դիմում փախստականների հարցերով գերագույն հանձնակատարից, Պարենի համաշխարհային ծրագրի ներկայացուցչից:
«Աշխատում ենք նաեւ ՄԱԿ-ի մանկական հիմնադրամի, ՄԱԿ-ի Զարգացման ծրագրի եւ, իհարկե, ՅՈՒՆԵՍԿՕ-ի հետ: Երեկ ես մանրամասնորեն խոսեցի ՅՈՒՆԵՍԿՕ-ի գլխավոր տնօրենի հետ այն մասին, որ այս կազմակերպությունը պետք է ավելի ակտիվորեն առաջարկի իր ծառայությունները` համաձայն այն բանաձեւերի, որոնք կապված են Լեռնային Ղարաբաղում եւ նրա շուրջը մշակութային, քաղաքակրթական եւ կրոնական ժառանգության պահպանման հետ: Սա շատ կարեւոր ներդրում կլինի աշխարհի այս հնագույն տարածաշրջանում միջկրոնական, ազգամիջյան հաշտեցման եւ ներդաշնակության ապահովման գործում: Ակնկալում ենք, որ ՅՈւՆԵՍԿՕ-ն այստեղ ավելի մեծ ակտիվություն կցուցաբերի, քան Սիրիայում։ Այսինքն կարծում եմ, որ չնայած Հալեպում եւ Պալմիրայում մշակութային հուշարձանների պահպանության ապահովման վերաբերյալ բազմաթիվ դիմումներին՝ ՅՈՒՆԵՍԿՕ-ի մեր բարեկամներն իրենց այնքան էլ ակտիվ չդրսեւորեցին»,- ընդգծեց Լավրովը։