Առողջապահության համաշխարհային կազմակերպության՝ COVID-19-ի հարցերով հատուկ ներկայացուցիչ Դեւիդ Նաբարոն նախազգուշացրել է 2021 թվականին Եվրոպայում կորոնավիրուսի երրորդ ալիքի սպառնալիքի մասին, եթե այդ երկրների կառավարությունները կրկնեն այն, ինչը նա անվանել է «վարակի երկրորդ ալիքը կանխարգելելու համար անհրաժեշտ գործողությունների իրականացման ձախողում», գրում է Reuters-ը:
«Նրանք բաց են թողել ամռան ամիսներին անհրաժեշտ ենթակառուցվածքների ստեղծումն այն բանից հետո, երբ հսկողության տակ էին վերցրել առաջին ալիքը»,-նշել է Նաբարոն շվեյցարական ԶԼՄ-ներին տված հարցազրույցում:
«Այժմ մեզ մոտ երկրորդ ալիքն է: Եթե նրանք չստեղծեն անհրաժեշտ ենթակառուցվածքը, հաջորդ տարվա սկզբում մենք կունենանք երրորդ ալիքը»,-ասել է Նաբարոն:
Վերջին շրջանում Եվրոպայում գրանցվել է կորոնավիրուսով վարակվելու դեպքերի աճ: Համաձայն վերջին տվյալների՝ Գերմանիայում եւ Ֆրանսիայում գրանցվել է մեկ օրում վարակման 33 000 դեպք, Շվեյցարիայում եւ Ավստրիայում՝ օրական միջինում գրանցվում է հազարական դեպք, իսկ Թուրքիայում սահմանվել է հակառեկորդ՝ մեկ օրվա ընթացքում վարակման 5 532 դեպք: