Ոնց կարող էին մեր զինվորները 7 պետության դեմ կռվել: Այս մասին, այսօր՝ նոյեմբերի 23-ին, ՊՆ-ի մոտ դիմելով ԱԺ «Իմ քայլը» խմբակցության պատգամավոր Անդրանիկ Քոչարյանին, ասաց անհետ կորած զինծառայողներից մեկի ծնողը:
Նշենք, որ այս պահին անհետ կորած զինծառայողների հարազատները հավաքվել են Պաշտպանության նախարարության մոտ ու պահանջում են պատասխան տալ իրենց հարցերին:
Անդրանիկ Քոչարյանն էլ արձագանքեց. «Բայց կորղացան չէ՞ կռվել: Ով մնաց, դա էս պետության տերերն են, նաեւ զոհվածները: Մենք պարտք ենք էդ սերնդին: Իմ զավակին Աստված փրկել է, բայց երբ որ ինքը խոսում է, իր մասին չի խոսում, ասում է՝ հայրեիկ, 6 ընկերներս, որ կողքիս մահացել են, իրենք տեր են: Նաեւ այդ մահացածներն անընդհատ իրենց կողքն են: Մենք բարդ վիճակում ենք, էս զոհերն ու ողջերը էս պետությունը պետք է բարձրացնեն: Սրանք խոսքեր չեն: Կորածներին պետք է գտնել, ինչքան կա»:
Նա նկատեց, որ ՊՆ-ում ղեկավար կազմը փոխվել է, եկել է նոր ղեկավար, որը նաեւ ՌԴ ղեկավար կազմի հետ քննարկել են այս հարցերը. «Նաեւ ունենք այս հարցերի պատասխաններին հրատապ հասնելու տարբերակներ, բայց նաեւ աննկարագրելի խոչընդոտներ, որ իրենք (ադրբեջանցիները) լկտիացած են: Ոչինչ, պետությունները հաղթում, պարտվում են: Մենք մեր հաջորդ հաղթանակը կերտելու համար պետք է այս ճգնաժամը հաղթահարենք: Այսօր մեզ հոշոտում է անտարբերությունը, երբ այդ անտարբերությունը հաղթահարենք, հաստատ կորցրածին շուտ կգտնենք, վիրավորին շուտ կհանենք: Երեւանում պատերազմ չի կարող լինել»,-ասաց Անդրանիկ Քոչարյանը:
Ակցիայի մասնակիցներն էլ արձագանքեցին. «Մենք պատերազմ չենք ուզում, մեր երեխեքին ենք ուզում»:
Դիտարկմանը, որ ծնողներից շատերը ցանկանում են մասնակցել որոնողական աշխատանքներին, Քոչարյանն արձագանքեց. «Որոնողական աշխատանքներն այս պայմաններում... մի հատ էլ ծնողներին կորցնե՞նք, որովհետեւ դա մի հատ ջունգլի էԴրան պետք է մասնակցեն իրավասություն ունեցող մարմինները՝ Կարմիր խաչը, ռուսական ստորաբաժանումները, մեր ստորաբաժանումները, որքան հնարավոր է, հումանիտար միջազգային կառույցներ: Սա բարդագույն խնդիր է»:
Ինչ վերաբերում է շրջանառվող տեղեկություններին, թե մի քանի տասնյակ հայ զինվորներ անցել են Իրանի սահման, Քոչարյանն ասաց. «Ողջ մնացած երեխաների մասին շատ հավաստի ինֆորմացիաներ կան: Նրանց հանելու խնդիրը այստեղ քննարկելու խնդիր չէ: Տա Աստված, թեկուզ մեկ կյանք փրկենք: Աստված տա ողջ լինեն»: Նա հավելեց, որ հյուսիսում մարմինները դուրս բերելու հարցը լուծվել է, իսկ հարավում ադրբեջանցիները «մունդռիկություններ» են անում. «Անընդհատ պրոբլեմներ են ստեղծում, որպեսզի Կարմիր խաչը, Ռուսաստանը արագ չկարողանան հարցը լուծել: Բայց շատ երկար չեն կարող, երեկ ավելի բարդ էր, քան այսօր: Ինձ համար շատ կարեւոր է, որ գտնենք ողջերին, վիրավորներին, նաեւ զոհերին բերենք հանձնեք հողին»: