Ինձ առաջադրված մեղադրանքով եկել էին մեր տուն՝ խուզարկության, ոչինչ չեն գտել: Այս մասին այսօր՝ նոյեմբերի 24-ին, լրագրողների հետ զրույցում ասաց «Քառյակ Մեդիայի» համահիմնադիր Միհրան Հակոբյանը՝ խոսելով ոստիկանության աշխատակիցների կողմից իր տունը խուզարկելուն:
Հիշեցնենք, որ Միհրան Հակոբյանը մեղադրվում է անհնազանդության ակցիաներին մասնակցելու եւ կազմակերպելու մեջ:
«Առավոտյան ոստիկաններն ու քննիչները եկան մեր տուն խուզարկության: Ինձ առաջադրված մեղադրանքով էին եկել: Չեն գտել ոչինչ, ինչ-որ դատարանով որոշված էր, որ պետք է փնտրեն: Դրա փոխարեն առգրավել են ո՛չ գործի հետ կապ ունեցող, ո՛չ էլ այս իրադարձությունների հետ կապ ունեցող ինչ-որ բաներ: Խուզարկությունը կատարվել է մի շարք խախտումներով, որովհետեւ դատարանի որոշման մեջ հստակորեն ֆիքսված էր, թե քննիչներից ով պետք է կատարեր խուզարկությունը, բայց այն կատարել է լրիվ այլ անձ, դրան գումարած, այն, ինչ փնտրում էին, չկար: Իսկ փնտրում էին ցուցակներ, ռուպորներ, ապօրինի հավաք կազմակերպելու պարագաներ, բնականաբար, նման բաներ չեն հայտնաբերել»,-ասաց Հակոբյանը:
Հակոբյանը տեղի ունեցածը որակեց որպես անձամբ Նիկոլ Փաշինյանի կողմից հրահանգավորված ապօրինությունների շարքի շարունակություն, եւ այս ամենը, ըստ նրա, քաղաքական հետապնդում է, որով Փաշինյանը փորձում է իրեն եւ շատերին լռեցնել:
«Ես չեմ լռելու, ես խոսելու եմ, շարունակելու եմ: Նիկոլ Փաշինյանը պետք է րոպե առաջ հրաժարական տա եւ հեռանա, որպեսզի մենք կարողանանք ապրել որպես պետություն եւ ժողովուրդ: Մենք պետք է շանս ունենանք»,-ասաց նա եւ հավելեց, որ օրեր առաջ իր ձերբակալելը եւս օրենքի կոպտագույն խախտմամբ է եղել եւ եղել է ուղիղ հանձնարարությամբ:
«Էս ո՞ր դարն է, եթե մեկը ապօրինի հավաք է կազմակերպում, տանը հավաքի մասնակիցների ցուցակնե՞ր է պահում: Բացարձակ աբսուրդ է սա: Այս ամենը պարզապես անտաղանդ քաղաքական հետապնդում է, որը որեւէ արդյունք չի տալու: Ես պատրաստ եմ թե՛ ազատազրկման, թե՛ կալանավորման: Ես շարունակելու եմ իմ գործունեությունը եւ մենք հասնելու ենք մեր ազգային նպատակին: Նիկոլ Փաշինյանն պատասխան է տալու պատերազմի, Արցախը հանձնելու, 5000 զոհերի համար»,-ասաց Միհրան Հակոբյանը՝ հավելելով, որ այս քաղաքական հետապնդումը իրենց միայն ուժ է տալիս:
