Արցախյան պատերազմին անհետ կորած զինծառայողների հարազատներից մի քանիսը քիչ առաջ ՌԴ դեսպանատանը հանդիպեցին դեպարտամենտի ղեկավարի հետ։
Անհետ կորած զինծառայողներից մեկի հարազատը՝ Եղիշե Զակունցը, պատմեց, որ իրենք փոխանցել են հարազատների նամակ-խնդրանքը։
«Առաջին խնդրանքն այն էր, որ Ռուսաստանի Դաշնությունը զբաղվի մեր ցավով, ինքը կարդաց նամակը եւ ասաց, որ այդ նամակին հենց հիմա ընթացք են տալու, դա փոխանցելու է ՌԴ դեսպանին։ Այդ նամակ-խնդրանքը, որը գրել ենք Վլադիմիր Պուտինին եւ Ռուսաստանի Դաշնությանը, այսօր լինելու է Մոսկվայում, իրենք կանեն ամեն ինչ, որպեսզի աջակցեն մեզ։ Մենք նրանց փոխանցեցինք նաեւ, որ ունենք ծնողներ, որոնք տեսանյութերում տեսել են՝ իրենց զոհված երեխաներին։ Նրանք ասացին՝ ամեն ինչ կանեն՝ մեր կողքին լինելու համար»,- ասաց Եղիշե Զակունցը։
Նա նշեց, որ պատերազմի ընթացքում գերի ընկած զինծառայողների հարցով ՌԴ-ն զբաղվում է. «Իրենք կարող են ունենալ ազդեցություն Ադրբեջանի կառավարության վրա եւ կարողանան ինչ-որ ձեւով իրենց խաղաղապահ զորքերին թողնեն ներս։ Նա ասաց, որ պետական մասշտաբով կզբաղեն այդ հարցով»։
ՌԴ դեսպանատան դիմաց իրենց ակցիան անհետ կորած զինծառայողների հարազատներն ավարտեցին։