Մինչեւ այս տարվա վերջ Լեռնային Ղարաբաղի բնակիչների մեծ մասը, այդ թվում` այն շրջանների, որոնք հայտնվել են ադրբեջանական կողմի վերահսկողության տակ, պետք է վերադառնան իրենց տները: ՏԱՍՍ-ին տված հարցազրույցում վստահություն է հայտնել ՀՀ վարչապետ Նիկոլ Փաշինյանը:
«Մենք ամեն օր աշխատում ենք այս ուղղությամբ, եւ ես վստահ եմ, որ կհաջողվի կայունացնել իրավիճակը,- ասել է նա:- Լեռնային Ղարաբաղի նախագահը դեռ երկու օր առաջ հայտնես, որ Լեռնային Ղարաբաղի 25 հազար բնակիչ արդեն վերադարձել է, եւ մենք համոզված ենք, որ տարեվերջին Լեռնային Ղարաբաղի բնակիչների մեծ մասը կվերադառնա: Եվ, իհարկե, մենք պատրաստվում ենք ստեղծել դրա համար անհրաժեշտ բոլոր պայմանները»:
«Մենք արդեն կոնկրետ որոշումներ ենք կայացրել, եւ այդ որոշումները վերաբերում են ֆինանսական աջակցությանն այն մարդկանց, ովքեր դրա կարիքն ունեն,- շարունակեց նա:- Երկու ծրագիր արդեն ընդունվել է, եւ առաջիկա օրերին եւս հինգ սոցիալական ծրագիր կընդունվելի: Իհարկե, կան շատ տներ, որոնք ավերվել են, եւ վերականգնման աշխատանքներ պետք է սկսվեն, բայց մեր գաղափարն այն է, որ նախ անհրաժեշտ է օպերատիվ ֆինանսական օգնություն ապահովել այդ մարդկանց, որպեսզի այդ ֆինանսների միջոցով նրանք կարողանան բավարարել իրենց առաջնահերթ կարիքները` Լեռնային Ղարաբաղ վերադառնալու համար: Հիմա կարող եմ ասել, որ երեւում է, թե ինչպես է այս գործընթացն իրականում տեղի ունենում, եւ սա իսկապես լավ նորություն է»:
«Շատ կարեւոր է նշել, որ Ռուսաստանի Դաշնությունը եւս մտադիր է քայլեր ձեռնարկել` Լեռնային Ղարաբաղի բնակիչների` իրենց տներ վերադարձն ապահովելու համար»,- հավելել է Փաշինյանը:
Ընդ որում, վարչապետը դրական է պատասխանել հարցին` արդյոք դա վերաբերում է նաեւ այն գյուղերին, որոնք հայտնվել են ադրբեջանական կողմի վերահսկողության տակ: «Այո, դա վերաբերում է Լեռնային Ղարաբաղի շրջաններին, եւ մեր համատեղ հայտարարության մեջ նախատեսվում է այդ մարդկանց վերադարձն իրենց տները»,- հստակեցրել է Փաշինյանը:
«Հենց այս կետի հետ կապված էլ պետք է հատուկ մեխանիզմներ, անվտանգության հատուկ երաշխիքներ ստեղծել, հարկավոր է ապահովել եւ կազմակերպել այս ամբողջ գործընթացը: Այս գործընթացը պետք է առաջնահերթություն դառնա բանակցային գործընթացի համար»,- ընդգծել է ՀՀ վարչապետը:
