Վաղը Աժ արտահերթ նիստն է, որի օրակարգում «Լուսավոր Հայաստան» խմբակցության կողմից ներկայացված նախագիծն է՝ Հայաստանում սեպտեմբերի 27-ից գործող ռազմական դրությունը վերացնելու մասին: Այս մասին հայտրարություն է տարածել «Ժառանգություն» կուսակցությունը:
Հայտարարությունում նաեւ ասվում է. «Ժառանգությունն» արձանագրում է, որ Աժ բոլոր խմբակցությունները, հատկապես «Իմ քայլը»՝ իբրև խորհրդարանական մեծամասնություն, մեծ պատասխանատվություն ունեն հայոց պետականությունը և ինքնիշխանությունը պահպանելու գործում:
Ժողովրդի յուրաքանչյուր քվեն նրանց պարտավորեցնում է հանձնառու լինել՝ կողմ քվեարկել ՀՀ-ում ռազմական դրությունը վերացնելու օրինագծին, որը նոյեմբերի 9-ին կնքված վտանգավոր համաձայնության իրականացման հակասական ընթացքում խաթարում է պետության սահմանադրական կարգը, խորացնում անիշխանությունը՝ ի ցույց դնելով պետական մարմինների կաթվածահար և անգործունակ վիճակը, խոչընդոտում մեզ պարտադրված պարտության բեռից նվազագույն կորուստներով դուրս գալու բոլոր ողջամիտ քաղաքական փորձերն ու հակաճգնժամային ծրագրերը՝ առավել բևեռացնելով հանրային տրամադրություները, պետության և ժողովրդի միջև պառակտման վիհը:
ՀՀ ԱԺ-ն պետք է սահմանադրական ճանապարհով ապահովի ձախողված կառավարության հրաժարականը վարչապետի գլխավորությամբ, նախաձեռնի անցումային կառավարության ձևավորումը՝ ոլորտում կայացած արհեստավարժների ու ճգնաժամային կառավարիչների ընտրությամբ՝ ապահովելով նոր ընտրական օրենսգրքի, սահմանադրական բարեփոխումների կայացումը, որոնց հիմքի վրա ողջամիտ ժամկետներում՝ 6 ամսից մինչև մեկ տարի, արտահերթ խորհրդարանական ընտրություններ կկատարվեն: Արցախի և Հայաստանի շահերը, ազգային, պետական անվտանգությունը վեր են ամեն ինչից:
